DILI, 24 Setembru 2025 (TATOLI)—Portavóz Estudante Universitáriu Timor-Leste, Natalício Nunes husu Parlamentu Nasionál (PN) atu iha debate revogasaun Lei Pensaun Mensál Vitalísia iha loron aban (25/09) fó rezultadu tuir povu nia ezijénsia.
“Ohin EUTL hakarak reafirma pozisaun ligada ho ita-nia akordu ne’ebé halo ona ho Parlamentu Nasinál hodi husu Parlamentu Nasionál ba debate iha loron aban nian, atu halo revogasaun ba Lei Pensaun Mensál Vitalísia,” nia informa ba jornlaista sira liuhusi konferénsia imprensa iha resintu UNTL, Kuarta ne’e.
Portavóz hatutan katak la’ós de’it halo revogasaun ba Lei Pensaun Mensál Vitalísia, maibé halo alterasaun mós ba Lei númeru: 1/2006 kona-ba liberdade reuniaun no manifestasaun nian.
Notísia relevante: Projetu Lei Revoga Pensaun Mensál Vitalísia ho efeitu retroativu
Nia solisita estudante, kamada sosiál no povu presiza akompaña debate aban iha PN kona-ba asuntu referidu.
Natalício hateten se aban sira (PN) la afavór ba desizaun povu nian, mak sira nafatin reziste hodi kontra desizaun ne’ebé iha.
Jornalista: Osória Marques
Editór: Xisto Freitas da Piedade
