Bombeiru Portugal entrega medalla apresiasaun ba PM Xanana
DILI, 26 Setembru 2025 (TATOLI)–Vise-Prezidente Bombeiru Portugal, Marco Martins entrega medalla apresiasaun ba Primeiru-Ministru (PM), Kay Rala Xanana Gusmão, tanba Timor-Leste nia asaun solidaridade liuhusi doasaun ba insédiu ne’ebé akontese iha Moimenta da Beira, Portugal.
Vise-Prezidente Bombeiru Portugal, Marco Martins hateten, nia prezensa atu entrega medalla no iha tempu hanesan akompaña Uniaun Bombeiru ba País ho Lian Portugés (UBPLP – União dos Bombeiros dos Países de Língua Portuguesa) ne’ebé antes ne’e Prezidénsia husi Angola entrega maskota simboliza Prezidénsia Rotativa ba Timor-Leste.
“Ohin ami mai iha ne’e tanba razaun prinsipál importante sira atu elojia Primeiru-Ministru, ba solidariedade neʼebé nia hatudu ba Povu Portugés hodi fó doasaun ho montante signifikativu hodi ajuda inséndiu sira neʼebé akontese iha tinan 2025,” Vise-Prezidente ne’e hato’o ba Jornalista sira iha Palásiu Governu, Kinta ne’e.
Notísia relevante : KM aprova rezolusaun apoia millaun $10 ba inséndiu iha Portugál
Nia dehan, Bombeiru Portugés fó ona emblema sidadania no méritu ba PM Xanana, ne’ebé hanesan onra ne’ebé a’as liu, fó ba indivíduu sira ne’ebé hatudu hahalok interrese boot hodi ajuda Bombeiru no komunidade iha Portugal.
“Iha oportunidade ne’e, ami mai atu hametin lasu kooperasaun ne’ebé iha ona entre Bombeiru Portugés no Bombeiru Timor-Leste, ho objetivu atu estabelese akordu parseria no kooperasaun,” nia katak.
Notísia relevante : UBPLP entrega maskota rotativa ba Timor-Leste no indika Paulo Anibal sai Prezidente
Nune’e, Bombeiru Portugés bele fó doasaun ekipamentu no materiál ba nia parseiru no fó formasaun iha eskola nasionál Bombeiru ba SFIA, dokumenta pesoál sira, no lori treinadór sira fó formasaun ba Bombeiru Timor-Leste.
“Ami-nia vizita mai Timor-Leste atu estabelese ligasaun metin ho Bombeiru Timor-Leste, liuliu ho povu Timor-Leste en-jerál. Signifika Bombeiru Portugés sira hakarak atu kontinua ajuda no kolabora hamutuk ho Bombeiru Timor-Leste no Povu Timor-Leste,” nia tenik.
Jornalista : Alexandra da Costa
Editora : Julia Chatarina
