BOBONARU, 06 Outubru 2025 (TATOLI) – Husi Janeiru to’o Setembru 2025, Sentru Saúde Komunitária Kailaku, munisípiu Bobonaru, rejista ema na’in-19 mak afeta moras tuberkuloze (TBC).
Xefe Sentru Saúde Komunitária Kailaku, Marçal Barros Soares, informa pasiente sira ne’e maioria mak adultu no idozu sira no iha mós idade labarik. Pasiente sira ne’e ne’e kontinua hetan tratamentu liu husi hemu ai-moruk rotina. “Tuberkuloze ne’e moras ida ne’ebé mak aas iha sentru Saúde Kailaku”, nia relata ba jornalista sira, ohin.
Nia esplika katak sentru saúde ne’e bainhira deteta iha laboratóriu katak pasiente ida pozitivu TBC maka Pesoál Saúde iha Família (PSF) halo sistema kontrolu ida ne’ebé di’ak, halo pasiente sira hemu ai-moruk, no laiha ema ida mak abandona sira.
Moras TBC mak vírus ida-ne’ebé hada’et husi baktéria “Mycobacterium tuberculosis” no halo infesaun iha pulmaun no isin-lolon sira seluk.
Sinál moras TBC mak me’ar beibeik liu semana 3 nia laran. Dalaruma mós me’ar-tasak kahur ho raan; hirus-matan moras no sente isin-kole hela de’it; isin-manas no kosar iha kalan; laiha vontade atu han halo isin tun maka’as.
Oinsá prevene moras TB?
Bá lailais Sentru saúde ne’ebé besik atu hetan tratamentu; taka ibun bainhira fani ka me’ar; labele tafui kabeen arbiru; habai kolxaun semana ida dala 1; loke janela atu anin no loromanas bele tama no sai; han hahán ne’ebé di’ak, ezemplu: modo, ai-fuan, na’an, susubeen no seluk tan; fase liman ho sabaun molok han no depoizde halo atividade.
Notísia relevante: Empreza Biasale hahú projetu konstrusaun sala maternidade SSK Kailaku
Jornalista: Sergio da Cruz
Editora: Maria Auxiliadora
