LIKISÁ, 10 Outubru 2025 (TATOLI) – Ministériu Komérsiu no Indústria (MCI, sigla portugés) liuhusi Diresaun Jerál Indústria realiza formasaun tékniku ba grupu indústria kiik kona-ba diversifikasaun tais ba pasta no karteira iha munisípiu Likisá.
Formasaun ida-ne’e rasik fó husi Diresaun Nasionál Indústria Manufakturera ba partisipante sira hamutuk ema sanulu (10) ne’ebé mai husi munisípiu Likisá no Munisípiu Vikeke. Formasaun ne’e hala’o durante loron neen (6) iha Postu Administrativu Maubara, Suku Vaviquinia, Munisípiu Likisá.
Li’an maktaka hosi Diretór Jerál Indústria, Martins Magno bainhira ofisialmente ensera formasaun ne’e.
Diresaun Jerál Indústria (DIJE) enkoraja partisipante sira ne’ebé partisipa iha formasaun ida-ne’e, atu aproveita no uza didiak matenek sira ne’ebé partilla husi formadora sira, hodi implementa ho di’ak iha sira-nia atividade prátika no dezenvolvimentu negósiu iha futuru.
DIJE mós reforsa katak Governu, liuhusi Ministériu Komérsiu no Indústria, kontinua halo esforsu no buka alternativa di’ak liután atu aumenta kapasidade no dezenvolve dezempeñu husi empreza ki’ik no média, hodi sira bele sai independente no iha kompeténsia atu konkore ho efisiénsia.
Ida-ne’e atu responde ba iha Timor-Leste nia adezaun ba membru Asosiasaun Nasaun sira iha Sudeste Aziátiku (ASEAN, sigla ingles), ne’ebé adezaun ofisiál sei akontese iha fulan Outubru tinan 2025. Alende ne’e, iha tinan 2024, Timor-Leste mós ofisiál sai membru ba Organizasaun Komérsiál Mundial (WTO, sigla ingles).
“Tanba ne’e, ita presiza prepara ho di’ak atubele konkore ho efisiénsia no fó kontribuisaun ativa iha kooperasaun ekonómiku rejionál no globál,” refere nota imprensa ne’ebé TATOLI asesa, sesta ne’e.
Representante Administradór Postu Administrativu (APA) Maubara, Maria Isabel Pereira dos Santos, Xefia Seksaun Administrasaun, akresenta formasaun ne’e konsidera interesante no importante tebes.
Ho formasaun sira hanesan ne’e, ajuda ona kapasita grupu negósiu sira-ne’ebé nia orentasaun atividade halai liubá industriá.
Formasaun ida-ne’e ajuda ona hodi aumenta no hasa’e koñesimentu kona-ba diversifikasaun tais hodi nakfilak ba iha pródusaun pasta no karteira no formasaun ida foin primeiru akontese iha Maubara.
“Tanba ne’e ami mós hakarak agradese ba esforsu husi Ministériu Komérsiu no Indústria liuhusi Dirasaun Jerál Indústria, ne’ebé kapasita no suporta grupu indústria sira-ne’e liuhusi formasaun ne’e,” Maria Isabel Pereira dos Santos, felisita formasaun ne’e hodi husu atu partisipante sira uza matenek ida-ne’e atu bele dezenvolve di’ak liután atividade negósiu.
“Nune’e bele hasa’e ita-boot sira-nia rendimentu hodi responde ba ekonómia famÍlia nia,” nia fó hanoin ba partisipante sira.
Partisipa iha serimónia enseramentu formasaun ne’e mai husi Reprezentante Komandate PNTL Likisá, Diretór Nasionál Planeamento MCI, Diretór Nasionál Diretór USD MCI Likisá no reprezentante Xefe Suku Vaviquinia.
TATOLI
