SEKOMS: Governu rekoñese papél jornalista iha ai-riin demokrasia no dezenvolvimentu
BOBONARU, 16 Outubru 2025 (TATOLI)—Sekretáriu Estadu Komunikasaun Sosiál (SEKOMS), Expedito Dias Ximenes, hateten Governu Konstitusionál da-sia (IX) rekoñese papél vitál husi mídia no jornalista sira ninian iha ai-riin demokrasia no dezenvolvimentu.
“Setór komunikasaun sosiál iha mundu enfrenta dezafiu, ezisténsia rede sosiál. Ita-nia sidadaun iha nasaun ne’e sei frajil ba Hoax, Misinformasaun, dezinformasaun, hatodan liutan ho prezensa Artifisial intelijénsia (AI) maibé SEKOMS kontinua aposta prioridade ba setór komunikasaun sosiál tuir kbiit no nesesidade,” Expedito hateten iha komemorasaun trajedia Balibo Five ba da-50 iha Balibo, ohin.
Maski nune’e, SEKOMS sente la la’o mesak maibé hakbesik nafatin ba parseiru dezenvolvimentu, buka esplora oportunidade sira iha rejionál no internasionál.
“Haree tiha sekuensia ohin, asina nota entendimentu entre ABC-ID ho konsellu Imprensa, anúnsiu bolsa estudu husi embaixada Asutralia ba jornalista sira halo komemorasaun tinan 50 ida-ne’e, kontinua metin no forte hodi fó onra no glória ba jornalista Greg Sakeltón, Tony Stiwart, Gary Kúningam, Malcom Rani, Braien Pitars sei temi ba nafatin iha jornalista no povu Timor-Leste ninia fuan,” nia afirma.
Nia hato’o agradesementu ba esforsu hotu-hotu husi ekipa, Konsellu Imprensa, Autoridade munisípiu, sosiedade sivíl, entidade sivíl no militár, joven no estudante tomak iha Balibo bele koopera malu hodi organiza selebrasaun ida ne’e realiza ho susesu.
“Maluk sira hotu, ohin kalan, ita mai sama hikas iha ain-fatin (hosi evidénsia tinan 50 ba kotuk). Jornalista Greg Shacleton deskreve katak atmosfera knua ida ne’e (Balibo) kesi sira ninia espíritu metin ho povu iha knua ida ne’ebé sira lahatene naran,” nia dehan.
Nia haktuir, Balibo iha tempu ne’ebá, knua izoladu, halo sira susar loos atu relata sira ninia reportajen ba to’o sala redasaun iha Australia, atu bele tranzmite hikas realidade iha kada televizaun sira-ne’ebé tidin iha sala vizita, kada uma husi sidadaun australianu sira atu bele asiste realidade husi Timor Portuges.
“Dokumentáriu hatudu momoos–ramata halo gravasaun vídeo stand up, Greg Sákelton espresa hodi hamonu ninia mate been husi ninia reportajen rasik. Ohin kompleta tinan 50, jornalista sira-ne’e ladauk fila ba sira ninia família, sei sai hela mistériu no ladauk iha resposta katak sira ninia isin haloot iha ne’ebé,” nia dehan.
Tanba ne’e, homanajen ba jornalista sira Balibo Five, respeitu no onra ba jornalista timoroan no estranjeiru ne’ebé durante tempu okupasaun fó kontribuisaun boot, hodi transforma Timor-Leste sai nasaun independente no soberanu.
“Ita-nia omenajen mós ba jornalista no servisu na’in iha imprensa nian, ema na’in 75 ne’ebé lakon vida durante sira misaun, hanesan relata husi dadus (Komite Protesaun ba Jornalista dentru tinan 2025 ne’e). SEKOMS hanesan órgaun Governu ne’ebé tau matan ba setór komunikasaun sosiál, kontinua garante liberdade imprensa no liberdade espresaun, hanesan garante nanis Timor-Leste ninia konstituisaun, ne’e kompromisu ida husi obra, luta no sakrifísiu jornalista sira ninian iha pasadu,” nia dehan.
Jornalista : Hortencio Sanchez
Editór : Cancio Ximenes
