DILI, 20 Outubru 2025 (TATOLI)—Xefe Departamentu imunizasaun iha Ministériu Saúde, Maria Angelina Pereira, hateten husi Janeiru mai to’o agora ne’e labarik feto idade 11-14 iha Timor-Leste ne’ebé simu ona vasina Human Papillomavirus (HPV) hamutuk 4.714.
Notísia Relevante: 2025, MS disponibiliza vasina HPV doze rihun-20
“Iha tinan 2025 husi Janeiru mai to’o agora, ita vasina ona labarik feto idade 11-14 hamutuk 37% mak simu ona vasina Human Papillomavirus kompara ho tinan kotuk ne’ebé ita halo kampaña ita-nia atinjimentu ne’ebé mak di’ak,” Maria Angelina Pereira hateten ba Agência TATOLI iha nia kna’ar fatin MS, Kaikoli, ohin.
Tinan kotuk atinje 95 % ba leten, tanba pesoal saúde sira halo vasina ba labarik feto sira ho idade 11-14 ba iha eskola sira maibé agora MS enkaixa ona ba vasina ida-ne’e iha rutina, signifika kataka labarik idade 11 ne’ebé mak seidauk ba eskola, pesoál saúde sira vasina ba labarik refere.
“Maibé ba labarik sira ne’ebé mak eskola haree liu labarik feto ensinu baziku sira hotu hotu hetan vasina, tanba ne’e ita foin hetan 37%. Esforsu ne’ebé mak pesoál saúde sira halo sira tun ba iha eskola hodi vizita no mós tama sai uma hodi buka tuir labarik sira ne’ebé mak iha no buka tuir labarik sira ne’ebé mak idade hanesan mak seidauk vasina sira fó vasina refere,tanba bainhira hetan atividade refere hanesan Programa Integradu Saúde sira fó ba estudante sira,” nia afirma.
Husi programa vasina HPV dalaruma pesoál saúde sira tama-sai uma fó informasaun ba inan-aman sira atu vasina labarik feto idade 11-14, balun inan-aman rejeita no balun simu.
Ezemplu, nia dehan, hanesan surtu COVID-19 ne’e banhira halo sensibilizasaun ne’e ema barak ema barak lakohi simu vasina, maibé ikus sira iha konsiénsia rasik mak lori sira-nia oan mai vasina iha fasilidade saúde sira-ne’ebé mak besik.
Antes ne’e, iha 19 Jullu 2024, Governu Timor-Leste servisu hamutuk ho Aliansa Mundiál ba Vasina no Imunizasaun (Gavi), Governu Australianu, Fundu Nasaun Unida ba Infánsia (UNICEF) no Organizasaun Mundiál Saúde (OMS), lansa ofisiálmente vasina kontra Papillomavirus Umanu (HPV) hodi prevene kankru serviks (úteru) ba labarik-feto sira ho idade 11 to’o 14.
Jornalista : Felicidade Ximenes
Editór : Cancio Ximenes
