AMD kontinua prepara kondisaun ba adezaun ASEAN
DILI, 24 Outubru 2025 (TATOLI)—Autoridade Munisipál Dili (AMD) kontinua prepara kondisaun liuhusi koordena ho liña ministeriál sira liuliu solusiona infraestrutura bázika bainhira Timor-Leste adere ona nu’udár membru Association of Southeast Asian Nations (ASEAN).
Prezidente Autoridade Munisipál (PAM) Dili, Francisco dos Santos esplika AMD sei halibur komunidade iha área Largo Lesidere hodi festeja loron Timor-Leste adere nu’udár membru plenu iha ASEAN iha 26 Outubru ne’ebé kuaze hala’o iha munisípiu hotu.
“Dili ne’e tenke organizadu, Dili sidade kapitál sentru ba ekonomia, polítika, kulturál no ministériu hotu-hotu hala’o atividade iha-ne’e, entaun AMD la mesak más nafatin serbisu hamutuk ho liña ministériu hotu,” Prezidente Autoridade Munisipál Dili hateten iha ninia kna’ar fatin, Matadouru, Dili, Kuarta ne’e.
Francisco relata Dili nu’udár autoridade ne’ebé sai kapitál ba Timor-Leste, tanba ne’e nu’udár PAM sempre apoia polítika Governu ligadu ho adezaun ASEAN no sei koordena ho liña ministériu sira hotu atu sidade Dili bele organizadu liután.
Nia haktuir sei serbisu maka’as hodi prepara kondisaun, hanesan prioridade dahuluk mak problema engarrafamentu iha kapitál Dili liuhosi koordenasaun ho Ministériu Telekomunikasaun no Transporte (MTK) ligadu ho projetu konstrusaun halte nune’e iha kondisaun ba transporte públiku.
Seluk mak hanesan ho Ministériu Obra Públika (MOP) hadi’a aselera reabilitasaun infraestrutura bázika liuliu estrada urbana iha Dili, hametin sistema dijitalizasaun ho MTK no Ministériu Administrasaun Estatál (MAE).
Aleinde ne’e, nafatin kooperasaun ho Sekretáriu Estadu Asuntu Toponímia (SEATOU) ligadu ho asuntu alargamentu estrada ne’ebé kontinua fazeadamente inklui Ministériu Komérsiu Indústria (MKI) hodi solusiona merkadu iha Dili.
“AMD sei haree de’it ba jestaun, konstrusaun fizika sira iha ministériu sira entaun tenke hakbesik aan ba ministériu sira hodi aselera projetu sira hanesan merkadu,” Francisco akresenta.
Entretantu, Timor-Leste rasik sei ofisializadu nu’udár membru ASEAN ba da-XI iha loron 26 Outubru hafoin iha tinan-2011 hato’o pedidu adezaun no iha tinan-2021 Timor-Leste sai nu’udár membru observadór.
Antes ne’e, ASEAN rasik iha membru permanente hamutuk nasaun 10 kompostu Kambódia, Indonézia, Laos,Vietname, Brunei Darussalam, Singapura, Myanmar, Filipina no Thailándia.
Jornalista: Natalino Belo
Editór: Xisto Freitas da Piedade
