OEKUSI, 28 Outubru 2025 (TATOLI) – Diresaun Rejionál Edukasaun Rejiaun Administrativa Espesiál Oekusi Ambeno (RAEOA), sei koordena ho estudante sira-nia inan-aman atu kontribui ba programa merenda eskolár iha ámbitu ezame pasajén klase tanba pedidu ba implementasaun programa merenda eskolár seidauk hetan aprovasaun husi Prezidente Autoridade RAEOA.
“Merenda eskolár seidauk hetan aprovasaun husi Autoridade RAEOA, tan ne’e estudante sira, ami sei husu inan-aman, atu tulun no fasilita almosu ba oan sira inklui mós profesór sira bele halo enkontru ho inan-aman sira, atu fornese netik merenda ruma, konforme jestaun eskola idak-idak, hanesan ospitalidade edukativa, katak serbisu hamutuk ho CARE, inan-aman, profesór no entidade husi diresaun rasik,” Diretór Diresaun Rejionál Edukasaun no Solidariedade Sosiál, Vincencio Cono, dehan, ohin.
Notísia relevante: https://tatoli.tl/2025/07/21/ai-han-tipu-tolu-iha-merenda-eskolar-oekusi-obedese-padraun-nutritivu/
Cono esplika katak, RAEOA iha autonomia finanseira, tan ne’e antes ne’e implementa ona ba loron efetivu 53 no termina ona iha loron 26 Setembru 2025, maibé tanba husi parte eskola atraza submete relatóriu, nune’e parte edukasaun halo intervensaun to’o kompletu ona mak foin submete tan pedidu foun ba Autoridade RAEOA liu-liu Prezidente Autoridade ba faze tuirmai ne’e.
“Maibé to’o agora seidauk hetan aprovasaun, ami hatene despaixu husi Prezidente Autoridade maibé seidauk aprova, tanba proposta ne’ebé ami hatama husu loron efetivu 15, tanba orsamentu ne’e direitu estudante sira-nian,” nia hateten.
Notísia relevante: https://tatoli.tl/2025/08/08/edukasaun-oekusi-identifika-ona-suku-ualu-atu-harii-ensinu-pre-eskolar-iha-2026/
Lembra fali katak, antes ne’e Servisu Edukasaun Oekusi aloka rihun $410,496.66 husi Orsamentu Jerál Estadu (OJE) 2025 atu implementa progama merenda eskolár ho loron efetivu 53 ba Ensinu Pré-Eskolár (EPE) hamutuk 16, Ensinu Bázika Filiál (EBF)12 no Ensinu Bázika Sentrál (EBC, sigla portugés) hitu (7).
Programa ne’e alvu ba estudante 18.441 ba loron efetivu 53 ho totál orsamentu ne’ebé mak sai iha segundu périodu estudante sei han $0,42 sentavus iha loron ida.
Jornalista: Abílio Elo Nini
Editór: Rafael Ximenes de A. Belo
