BOBONARU, 29 Outubru 2025 (TATOLI) – Ekipa husi Diresaun Inspesaun no Auditoria, Ministériu Dezenvolvimentu Rurál no Abitasan Komunitária (MDRHC, sigla portugés) halo inspesaun ba atividade agríkola no pekuária husi grupu Hultopol no Lali’a Giral, iha aldeia Tunubibi, suku Tapo-Memu, postu administrativu Maliana, munisípiu Bobonaru.
Koordenadór Gabinete Inspesaun no Auditoria MDRHC, Francisco de Jesus Araújo, hateten inspesaun ne’e atu haree lala’ok programa dezenvolvimentu rurál ne’ebé la’o iha terrenu, tanba informasaun ne’ebé espalla iha públiku katak atividade husi grupu rua ne’e paradu.
Husi rezultadu inspesaun ne’e, Francisco Araújo, nota katak maski mosu konflitu uitoan iha grupu laran, maibé atividade kontinua la’o, eseptu haki’ak manu Mareko.
Grupu mós rekomenda ba MDRHC atu apoia formasaun hodi kapasita membru sira iha área pekuária nian.
Notísia relevante: Sein fundu, atividade haki’ak manu Mareko iha Tunubibi paradu
“Paradu uitoan tanba sira iha grupu ne’e rasik sei hanoin saida mak di’ak atu hala’o fali sira-nia atividade. Tuir informasaun, manu ne’ebé sira haki’ak, ba merkadu ladún hetan benefísiu, ema atu sosa mak menus. Tanba ne’e mak mosu dezentendimentu entre sira-nia hanoin”, nia informa ba jornalista sira hafoin inspesaun, iha tersa-feira ne’e.
Xefe Sentru Dezenvolvimentu Aldeia, Adriano Santos, rekoñese atividade haki’ak manu Mareko mak paradu, maibé grupu sei kontinua la’o ho atividade fa’an ikan, kuda modo no seluk tan.
Atuál xefe aldeia Tunubibi ne’e subliña Sentru Dezenvolvimentu hamutuk ho xefe grupu no membru sira sei tuur hamutuk hodi trasa planu ba oin atu haki’ak manu seluk.
Xefe Grupu Lali’a Giral, Paulo Fernando Loe, adminte katak durante ne’e atividade la la’o ho di’ak, tanba manu Mareko ne’ebé sira haki’ak kolleta de’it balu no barak liu mak mate tanba kauza hamlaha no seluk tan.
“Ami iha grupu rua. Ida ha’u lidera ne’e maka iha [osan tama] $1,437, grupu ida fali $1,710”, adianta.
Lembra katak MDRHC apoia fundu rihun $40 ba grupu rua ne’e hodi halo atividade haki’ak manu Mareko.
Notísia relevante: Benefisiáriu sira iha Tunubibi haksolok ho programa Uma Dignu ba Povu
Jornalista: Sergio da Cruz
Editora: Maria Auxiliadora
