DILI, 30 Outubru 2025 (TATOLI)—Asosiasaun Jornalista Timor-Leste (AJTL) hamutuk ho United Nations Educational, Scientific and Cultural Organization (UNESCO), Kinta ne’e, realiza diskusaun meza redonda hamutuk ho dirijente mídia iha Timor-Leste hodi estabelese protokolu reportanjen kona-ba dezastre naturál iha futuru.
Prezidente AJTL, Zevonia Vieira, hateten diskusaun ne’e importante tanba atu rona informasaun sira kona-ba esperiénsia kobertura, planu kobertura no protokolu ne’ebé estabelese iha redasaun inklui preparasaun seguransa ligadu ho reportajen iha área dezastre naturál nune’e futuru sai referénsia hodi dezeña protokolu reportajen ba jornalista sira bainhira akontese dezastre naturál.
“Ita seidauk iha protokolu ba mídia sira atu utiliza ba jornalista hodi halo kobertura, entaun UNESCO fó apoia atu ita kria protokolu hodi halo kobertura ba dezastre naturál iha Timor-Leste,” Prezidente AJTL hateten iha edifísiu Konsellu Imprensa (KI), Kintal Boot, Kinta ne’e.
Zevonia hatutan bainhira rona tiha hanoin hotu husi editór mídia sira, faze daruak sei envolve institusaun relevante sira hanesan Autoridade Protesaun Sivíl, Akademista, Organizasaun Naun Govermentál ne’ebé foku ba klima no dezastre naturál antes kontinua ba faze ikus hodi estabelese padraun ka matadalan sira kona-ba kobertura dezastre naturál.
Iha fatin hanesan, Ofisiál Projetu no Unidade Informasaun no Unidade Komunikasaun, Associate Project UNESCO Jakarta, Yekthi Hesthi Murthi, hateten diskusaun ida-ne’e ho objetivu atu hasa’e koñesimentu no prepara aan ligadu ho kobertura iha área klima no dezastre naturál ne’ebé sei kompleta ho dadus akuradu, fasilidade sufisiente nune’e reportajen sira bele esklarese ba komunidade ligadu ho prevensaun dezastre naturál.
Aleinde ne’e, jornalista presiza asesu dadus husi instituisaun dezastre naturál ho akuradu tanba bele ajuda Governu foti desizaun hodi apoia mídia no fasilidade kona-ba ekipamentu seguransa bainhira halo kobertura iha terrenu.
Iha fatin hanesan, Prezidente Konsellu Imprensa, Cesar Mali konsidera diskusaun meza redonda ne’e importante tanba bele iha vizaun jerál kona-ba padraun kobertura relasiona ho mitigasaun no akontesimentu dezastre naturál iha Timor-Leste.
“Presiza duni atu estabelese protokolu. Ita seidauk iha protokolu liuliu mak matadalan kona-ba seguransa jornalista bainhira halo kobertura iha terrenu,” Cesar esklarese.
Cesar argumenta, Konsellu Imprensa nafatin apoia atividde referida no kontinua sai ponte ho parseiru dezenvolvementu seluk inklui Governu Timor-Leste, nune’e futuru bele estabelese matadalan ba kobertura klima no dezastre naturál iha Timor-Leste.
Entretantu, atividade diskusaun meza redonda dahuluk ne’e loke direta husi Prezidente Konsellu Imprensa, Cesar Mali no hetan partisipasaun husi xefe redasaun, editór mídia tantu imprime, online no rádiu hanesan Timor post, Lafaek News, Saps News, Agência TATOLI no seluk tan.
Jornalista: Natalino Belo
Editór: Xisto Freitas da Piedade
