OEKUSI, 07 Novembru 2025 (TATOLI) – Komisaun Organizadora ba komemorasaun loron nasionál Juventude, 12 Novembru 1999-12 Novembru 2025, daudaun ne’e prepara ona ajenda ho atividade prinsipál lima atu komemora iha Rejiaun Administrativa Espesiál Oekusi Ambeno (RAEOA).
Prezidente Komisaun Organizadora ba komemorasaun loron nasionál Juventude no Loron Akontesimentu Masakre Santa-kruz 12 Novembru iha Oekusi, Orlandus Colo, hateten, atividade prinsipál lima ne’e, sei implementa durante loron neen (6), atividade primeiru, hahú iha sesta-feira ohin, loron 07 Novembru 2025, hahú halo deskrisaun ba atividade limpeza jerál iha resintu Sentru Juventude Rejiaun Oekusi (SJRO).
Depois kontinua hala’o limpeza mós ba igreja parókia Numbei no igreja antigu Santo António depois hala’o limpeza mós ba semitériu santa krus iha bairru Santa-Rosa, ne’ebé responsavel másimu husi juventude no estudante sira inklui instituisaun Estadu sira.
Notísia relevante:Joven no funsionáriu la partisipa másima iha komemorasaun 12 Novembru iha Oé-Cusse
Atividade daruak iha loron sábadu 08 Novembru, komisaun organizadora sei organiza hodi monta panfleta ka banner iha fatin públiku, monta tenda preparasaun inklui halo dekorasaun no domingu 09 Novembru, hala’o misa agradesimentu iha igreja parókia Numbei.
Atividade datoluk, iha loron segunda 10 Novembru, abertura jerál atividade komemorasaun Masakre Santa-Krus no selebrasaun loron nasionál juventude 12 Novembru 2025 nian, fatin iha resintu Sentru Juventude Rejiaun Oekusi, hafoin ne’e, kontinua kedas abertura sertame ba estudante sira no hala’o doasaun raan iha ospitál referál Oekusi no mós hala’o semináriu públiku.
Notísia relevante:Komemorasaun 12 novembru hanesan lisaun valór nasionalizmu no patriotizmu
Atividade dahaat, iha loron tersa-feira 11 Novembru, atividade diskursu kalan reflesaun sei aprezenta husi Prezidente Komite 12 Novembru RAEOA nian no padre parókia igreja Numbei, Carlos de Deus. Depois kontinua kedas ba demostrasaun sunu lilin, kontinua asiste filmajén akontesimentu 12 Novembru 1991, dahur hamutuk, depois misa, hafoin misa ramata komisaun organizadora organiza halo karavana (pawai) no kari ai-funan iha semitériu santa-krus bairru Santa-Rosa.
Atividade ikusliu, iha loron kuarta-feira 12 Novembru, kompetisaun sertame no diskursu públiku depois kontinua fahe prémiu ba manán na’in-sira no enseramentu jantar fraternidade.
“Selebrasaun 12 Novembtu tinan ne’e, ita prepara ona konvite 120 iha Pante Makasar nian, tanba selebrasaun ne’e la’ós konsentra de’it iha Pante Makasar, maibé ita koloka ona komisaun sira, balu sei selebra hamutuk ho komunidade sira iha sub-rejiaun haat, Oésilo, Pássabe, Nítibe no atividade lima ne’e iha Pante Makasar,” informa Prezidente Komisaun, Orlandus Colo, ba Ajénsia Tatoli,I.P iha Oekusi, ohin.
Mate restu 12 Novembru 1991 ne’e, relata atu finansia atividade prinsipál lima ne’e, antes ne’e Ministériu Juventude Desportu Arte no Kultura (MJDAK) apoia ona fundu hamutuk $2.900,00 no husi parte Autoridade RAEOA apoia rihun $10.
“Osan ne’e ita fahe ba sub-rejiaun haat, tanba atividade no progama la hanesan, iha Oésilo ketak, Pássabe hanesan mós ho Nítibe, iha Pante Makasar mós hanesan, idak-idak ho ajenda rasik,” nia hateten.
Notísia relevante:MJDAK prevee $3.500 ba Sentru Juventude Vikeke komemora Masakre Santa Krús
Entretantu, tema ba komemorasaun loron nasionál juventude no loron akontesimentu Masakre Santa-Krus 12 Novembru ba tinan ne’e mak, ‘Ha’u Timoroan Orgullu ho Ha’u-Nia Nasaun’
Jornalista: Abílio Elo Nini
Editór: Rafael Ximenes de A. Belo
