OÉ-CUSSE, 12 Novembru 2024 (TATOLI) – Prezidente Komité 12 Novembru Oé-Cusse, Domingos de Almeida, rekomenda ba Autoridade Rejiaun Administrativa Espesiál Oé-Cusse Ambeno (RAEOA) hodi kria polítika iha di’ak ba selebrasaun 12 Novembru iha 20225, tanba tinan ne’e partisipasaun joven no funsionáriu públiku la másimu.
Sobrevivente ne’e hato’o iha ámbitu kari ai-funan no sunu lilin iha semitériu Santa Krús iha bairru Krús, Oé-Cusse, ohin.
“Hanoin took atu hadi’a komemorasaun ne’e, tanba kada tinan ema sira mai mak ha’u haree nafatin de’it. Ita bele hateten seidauk iha patriotizmu no nasionalizmu. Partisipasaun ladún másimu nomós funsionáriu públiku maske ohin feriadu hela, maibé lakohi soe tempu mai fó netik omenajen”, Domingos de Almeida lamenta.
Notísia relevante: 12 Novembru fanu joven sira atu afirma nasionalizmu no patriotizmu
Maske nune’e, nia reprezenta Komité 12 Novembru Oé-Cusse no komisaun organiza agradese ba Pároku Numbei, Júlio do Carmo, hamutuk ho madre no frater sira tanba bele prezide misa to’o karii ai-funan iha semitériu.
“Agradese ba ita hotu ohin tuir misa no kontinua mai iha semitériu tau ai-funan hodi hanoin netik maluk sira-ne’ebé mate iha Masakre Santa Krús iha tinan 30 liubá. Ami sira-ne’ebé ohin hamrik iha ne’e, sai sasin katak ne’e la’ós buat inventa ka bosok, maibé ne’e realidade katak só juventude loriku asu’ain mak fó nia hirus-matan, ikus mai Timor-Leste nia problema hanesan manu-tolun nakfera, tanba mundu rekoñese katak Timór iha problema, liuliu violasaun direitu umanu, tanba masakre ne’e”, nia realsa.
Notísia relevante: “Joven sira tenke banati eroi libertasaun hodi kontribui ba dezenvolvimentu”
Iha sorin seluk, Sekretáriu Rejionál ba Asuntu Saúde, Luís de Jesus Neno, reprezenta autoridade RAEOA konsidera rekomendasaun ne’e importante atu funsionáriu públiku, joven, liuliu estuante atu partisipa másima.
“Rekomendasaun ne’ebé hato’o mai, ami konsidera, tanba realiza komesa horisehik to’o ohin misa no karik ai-funan partisipasaun loos duni laiha, liuliu servidór Estadu no joven sira, maibé loron ne’e importante ba Timor-Leste”, nia dehan
Tanba ne’e, nia fó hanoin ba Sentru Juventude Rejiaun Oé-Cusse (CJRO, sigla portugés) ho Komité 12 Novembru Oé-Cusse molok realiza serimónia persiza koordenasaun.
“Asuntu ohin ami sei hato’o ba Prezidente Autoridade RAEOA, maibé ami husu kuandu tinan oin antes semana rua persiza komunika ho autoridade atu kria enkontru hodi estabese komisaun, nune’e ita bele kria planu sira no aneksa ho atividade atu anima ita-nia joven sira hodi halo reflesaun ba Loron Nasionál Juventude ne’e”, nia sujere.
Notísia relevante: Marí Alkatiri: “Ha’u preokupa liu ho vida juventude nian ba oin”
Tuir obsevasaun Tatoli, hafoin misa, joven sira hamutuk ho a Komité 12 Novembru no autoridade RAEOA la’o ain husi igreja Numbei to’o semitériu Santa Krús hodi sunu lilin no kari-aifunan.
Jornalista: Abílio Elo Nini
Editora: Maria Auxiliadora
