DILI, 12 novembru 2024 (TATOLI) – Eis Primeiru-Ministru no Atuál Sekretáriu Jerál Partidu FRETILIN, Marí Alkatiri hateten, preokupa liu ho vida juventude nian ba oin tanba laiha polítika ida iha nasaun ne’e atu fó konfiansa ba juventude sira hateke ba futuru.
“Maluk sira, ha’u preokupa liu vida juventude sira nian ba oin, agora ita laiha polítika ida atu fó konfiansa ba joven sira nia esperansa iha futuru,” Alkatiri hateten ba jornalista sira bainhira partisipa iha selebrasaun masakre Santa Cruz ba Dla-33, iha semitériu Santa Cruz- Dili, tersa ne’e.
Tuir líder nasionál ne’e, futuru nasaun ne’e iha joven hotu nia liman, bainhira laiha polítika ida atu enkuadra joven sira iha prosesu dezenvolvimentu mak nasaun ne’e sei hasoru problema iha futuru.
“Realidade ita laiha polítika ida atu enkuadra joven sira iha prosesu tomak dezenvolvimentu, laiha polítika ida atu hadi’a edukasaun, hadi’a saúde, atu joven sira bele manán matenek, manán siénsia, manán teknolojia, se laiha polítika ida ne’e, ha’u nafatin halo rezeisaun polítika tanba la fó importansia ba joven sira nia futuru,” líder nasionál ne’e afirma.
Kona-ba rekonsiliasaun
Líder nasionál ne’e mós dehan tan laiha modelu rekonsiliasaun di’ak liu bainhira la mai husi fuan.
“Laiha modelu ida di’ak liu kona-ba rekonsiliasaun, maibé modelu di’ak liu mai husi ita nia fuan, iha ita nia laran, maibé ita la’ós halo renoksiliasaun atu buka votu, ida ne’e mak modelu di’ak liu,” Alkatiri hateten kona-ba modelu rekonsiliasaun.
Alkatiri dehan, naran CAVR nia rasik mak fó no povu Indonézia ho povu Timor-Leste la presiza halo rekonsiliasaun no intendimentu. Entre Estadu tenke presiza verdade no lia-loos atu iha amizade.
“Ita nia relasaun ho Indonézia iha fatór tolu, ida povu ho povu, rua Estadu ho Estadu, tolu asuntu ida ne’ebé pendente to’o ohin loron timoroan sira kontinua hela iha Indonézia, sa polítika mak ita halo atu enkuadra sira ba prosesu dezenvolvimentu Timor-Leste nian, ne’e mak rekonsiliasaun ho sira, enkuadra tau sira iha fatin ida ho dignu atu bele partisipa iha prosesu dezenvolvimentu nasaun Timor nian,” katak Mari Alkatiri.
Kona-ba taka kanek sira iha tempu pasadu
“Ba FRETILIN husu ona deskulpa ba nia sala rasik ne’ebé halo iha tempu pasadu, la presiza ema fó lisaun ba FRETILIN, ha’u iha rai-liur mai iha ne’e hanesan líder FRETILIN husu ona deskulpa ba hahalok naksalak sira FRETILIN halo iha tempu kotuk,” nia katak.
Nia hatutan, bainhira atu hateke ba oin ema ida-idak tenke asume nia pasadu no labele taka ba públiku kona-ba pasadu ne’ebé liu ona.
“Agora ita taka hotu buat sira pasadu ko’alia de’it mak rekonsiliasaun mamuk ho konteudu, ida ne’e la’ós rekonsiliasaun, ema ida-idak tenke asumi nia responsabilidade ne’ebé halo ona iha pasadu,” nia hakotu.
Notísia relevante:PR Horta husu joven sira promove rekonsiliasaun
Jornalista: Hortencio Sanchez
Editór: Florencio Miranda Ximenes
