VIKEKE, 05 Novembru 2025 (TATOLI)—Diretór Sentru Juventude Munisípiu Vikeke, Januario Benevides informa Ministériu Juventude, Desportu Arte no kultura (MJDAK) prevee $3.500 ba Sentru Juventude Munisípiu Vikeke hodi komemora Masakre Santa Krús ba da-34 (12 Novembru 1991-12 Novembru 2025).
“Foin lalais ami hato’o pedidu ba MJDAK no pedidu ne’e hetan ona aprovasaun. Daudaun ne’e ami hein prosesu transferénsia orsamentu,” Januario ba TATOLI iha Postu Vikeke Vila, Kuarta ne’e.
Januario hatutan, husi orsamentu ne’e, Sentru Juventude Munisípiu Vikeke sei aloka $600 ba kada postu no aloka $500 ba Sentru Juventude hodi halo preparasaun, monitorizasaun ba atividade komemorasaun no prepara relatóriu sira hodi submete filafali ba MJDAK.
“Komemorasaun Masakre Santa Krús ba tinan ida-ne’e ita define tema mak ‘Ha’u timoroan orgullu ho ha’u-nia rai’. Nune’e, ba komemorasaun nian ami hahú halo koordenasaun ho Prezidente Autoridade Munisípiu Vikeke, Komite 12 Novembru Munisípiu Vikeke nian no mós administradór postu sira atu ita haree planu implementasaun atividade ba komemorasaun nian,” nia informa.
Januario hateten iha komemorasaun ne’e Sentru Juventude Munisípiu Vikeke halo karta konvite ba família sira husi Saudozu Sebestião Gomes no sobrevivente Masakre 12 Novembru sira husi Vikeke atu partisipa.
Nia subliña atividade iha komemorasaun ba tinan ne’e mak hanesan kalan reflesaun, limpeza jerál, ativdade sosiál, semináriu, misa no kari ai-funan ne’ebé sei realiza iha kada postu lima.
Januario solisita juventude iha Munisípiu Vikeke atu partisipa másima selebrasaun Loron Masakre 12 Novembru tanba loron ne’e loron ne’ebé juventude pasada oferese sira-nia aan luta ba rai ida-ne’e nia independénsia.
“Joven sira agora tenke kaer metin espíritu nasionalizmu no patriotizmu ne’ebé hatutan hela ba ita, nune’e ita mós bele sente sentidu pertense ba ita-nia rai hodi dezenvolve di’ak liután ita-nia nasaun bá-oin,” nia hato’o.
Jornalista: Vitorino Lopes da Costa
Editór: Xisto Freitas da Piedade
