DILI, 10 Novembru 2025 (TATOLI)—Governu liuhusi Ministériu Juventude, Desportu, Arte no Kultura (MJDAK) prevee rihun $19-resin hodi komemora Loron Nasionál Juventude ba da-20 no Masakre Santa Krús ba da-34.
Prezidente Komité 12 Novembru ein Ezersísiu, Filipe Rodrigues Pereira, hateten tinan-tinan orsamentu ba komemorasaun ne’e maihosi MJDAK hodi hala’o atividade sira, ne’ebé ho tema jerál: “Ha’u ema Timor, Orgullu ho ha’u-nia Nasaun”.
Filipe esplika tema hatudu ema timoroan tenke orgullu ho saida mak juventude sira uluk luta ba independénsia.
“Kona-ba orsamentu ne’ebé selebra loron Masakre Santa Krús ne’e MJDAK mak prevee rihun $19-resin no atividade sira ne’e juventude mak realiza,” Filipe Rodrigues hateten ba TATOLI, iha resintu Ministériu Edukasaun (ME) iha Vila Verde, Dili, Segunda ne’e.
Iha fatin seluk, Prezidente Komisaun Organizadora ba selebarasaun Masakre Santa Krús 12 Novembru, Denilson Guteres, hatutan komemorasaun Masakre Santa Krús ba dala-34 sei iha atividade lima.
“Ita-nia komemorasaun ba tinan ne’e ho atividade prinsipal lima mak konsulta saúde masal ba sobrevivente no família, limpeza jerál ba komemorasaun Masakre Santa Krús, kalan reflesaun, misa komemorasaun Masakre Santa Krús no kari ai-funan iha Santa Krús,” nia dehan.
Nia hateten loron 11 Novembru kalan iha Semitériu Santa Krús sei iha reflesaun filafali ba Saudozu Sebastião Gomes nia mate, no iha loron-12 dadeer misa iha Igreja Motael, depoiz misa sei halo marsa ba semitériu Santa Krús hodi kari ai-funan.
Jornalista: Osória Marques
Editór: Xisto Freitas da Piedade
