DILI, 15 Novembru 2025 (TATOLI)–Ekipa Maudoko Football Club hakat bá pozisaun daruak iha tabela klasifikasaun primeira divizaun hafoin halakon Akadémika FC ho skor 4-0 iha jornada dahaat Liga Futeból Femininu Timor-Leste (LFFTL).
Ekipa Maudoko FC ne’ebé antes ne’e iha pozisaun dahaat ho pontu hitu (7), rezultadu manán rua (2) no impata ida (1), hakat sa’e eskada rua ba pozisaun daruak hafoin rekolla pontu sanulu (10) no dudu tun S’amuser FC ba pozisaun datoluk ne’ebé rekolla pontu sia (9), rezultadu manán tolu (3) husi jogu tolu.
Jogu jornada dahaat entre Maudoko FC kontra Akadémika iha parte dahuluk ramata ho skor 1-0 iha-ne’ebé golu prodús liuhusi ulun enxe husi jogadora Serena Lopes iha minutu 39 hafoin aproveita bola falta liuhosi kantu.
Maudoko FC serteja manán ho skor 4-0 hafoin jogu parte daruak aumenta tan golu tolu husi jogadora sira hanesan Feri Bini iha minutu 57, Anisya Widya iha minutu 74 no own goal husi kapitán Akadémika, Maria Trindade iha minutu 65.
Ho rezultadu jogu entre ekipa rua, rezulta Akadémika FC ne’ebé antes ne’e iha pozisaun dalimak tenki tun eskada ida bá pozisaun daneen, rezultadu husi manán ida (1), derrota tolu (3) no produtividade golu menus ualu (-8).
Akadémika FC garante mantein iha primeira divizaun
Entretantu, Akadémika Football Club rekoñese menus jogadora maibé kompromete sei esforsu hodi mantein iha kompetisaun primeira divizaun Liga Futeból Femininu Timor-Leste (LFFTL).
Treinadór Akadémika FC, Marnivio Santa esplika kompetisaun primeira divizaun iha ekipa haat mak konsideradu forte hanesan Maudoko FC, Buibere FC, AD-SLB no S’amuser iha-ne’ebé difikulta atu gaña pontu maibé oportunidade atu gaña pontu husi ekipa lima seluk ne’ebé iha forsa hanesan ho Akadémika FC.
“Ami nafatin iha esperansa iha jogu tuirmai no sei la tun ba segunda divizaun tanba ami sei gaña pontu husi ekipa seluk ne’ebé ho ami forsa hanesan,” Treinadór Akadémika FC informa ba TATOLI iha Estádiu Munisipál Dili, Sábadu ne’e.
Marnivio relata ekipa lima seluk ne’ebé forsa hanesan mak Kulugisa FC, UNITAL FC, VDL FC, Na’in-Feto no Maranatha FC nune’e inportánsia mak nafatin evalua liuhosi treinu hodi hasa’e ko’alia ekipa iha jogu seluk tuirmai.
Nia rekoñese Akadémika FC falla iha liña guarda rede nune’e fásil ba adversáriu atu prodús golu tanba ne’e iha janela transferénsia sei rekruta jogadora guarda rede, defeza inklui avansadu hodi mantein pozisaun iha primeira divizaun LFFTL.
“Ami-nia guarda rede mak falla tanba laiha treinadór tanba ne’e sei aumenta jogadora iha ronda daruak,” Marnivio akresenta.
Entretantu, Akadémika FC to’o jornada dahaat rezulta iha pozisaun daneen ho pontu tolu (3) tabela klasifikasaun hafoin manán ida (1) no derrota tolu (3).
Jornalista: Natalino Belo
Editór: Xisto Freitas da Piedade
