DILI, 17 Novembru 2025 (TATOLI)–Delegasaun Grupu Asosiasaun Klase Sosiál Yangjiang (ACSY) husi Xina hasoru-malu ho Ministru Agrikultura, Pekuária, Peska no Floresta (MAPPF), Marcos da Cruz, hodi ko’alia kona-ba investimentu iha setór agrikultura iha Timor-Leste.
Tuir Ministru Agrikultura, Pekuária, Peska no Floresta, Marcos da Cruz, dehan ohin diskute setór haat ne’ebé sai pilár importante haat iha setór agrikultura.
“Ohin ami hasoru malu ho delegasaun ida husi Xina hodi ko’alia kona-ba investimentu iha setór agrikultura, pekuária, peska no floresta, iha-ne’ebé sira iha interese atu analiza posibilidade atu hasa’e produsaun,” Ministru Marcos dehan ba jornalista sira iha Komoro, Dili, Segunda ne’e.
Ministru Marcos hatutan Asosiasaun Klase Sosiál Yangjiang sei investe iha área agrikultura, pekuária, peska, no floresta. “Ha’u esplika ba sira katak ita-nia nasaun ki’ik liu tanba ne’e seidauk dezenvolve iha área potensiál atu investe iha setór haat ne’ebé husu mai ita”.
Nia hatutan katak Xina sei ajuda ho aspetu tékniku balun hodi hasa’e produsaun no atinje seguransa ai-han tanba setór agrikultura iha Xina avansadu liu tanba ne’e presiza aprende husi sira.
Iha parte seluk, Xefe Delegasaun hosi Grupu Xinés Asosiasaun Klase Sosiál Yangjiang (YNSSA), Lun Welomg, reforsa katak sira iha esperiénsia iha setór agríkola iha área pekuária, peska, floresta, kuda modo, haki’ak ikan tasi no kuda ai-horis iha foho.
“Ita-nia prezensa iha Timor-Leste atu hasoru-malu ho MAPPF ho nia ekipa tomak atu diskute kona-ba setór agrikultura no oinsá servisu hamutuk ba futuru dezenvolvimentu setór agrikultura nian,” nia subliña.
Jornalista: Osória Marques
Editór: Xisto Freitas da Piedade
