DILI, 24 Novembru 2025 (TATOLI)—Ekipa futeból femininu AD SLB Laulara hurlele Akadémika FC ho skor 11-0, enkuantu S’amuser impata ho Buibere iha jogu jornada dalimak primeira divizaun Liga Futeból Femininu Timor-Leste (LFFTL).
Jogu rua referida hala’o iha Estádiu Munisipál Dili, Domingu (23/11/2025), iha-ne’ebé Akadémika kontra AD SLB rezulta ekipa husi Laulara lidera iha parte dahuluk ho skor 0-3 ne’ebé golu prodús husi jogadora Maria Conceição iha minutu 29 no 42, inklui penalidade ne’ebé ezekuta husi jogadora Astri iha minutu 37.
Iha parte daruak, AD SLB hasa’e liután ritmu atake hodi rezulta tan golu hitu ne’ebé prodús husi jogadora sira hanesan Maria Conceição iha minutu 47, 54, 68, 89 no 90, Natacia Alves iha minutu 52 no golu rua husi Eyaya iha minutu 59 no 86.
Enkuantu, S’amuser FC no Buibere ne’ebé iha ambisaun hakarak gaña pontu hodi lidera tabela klasifikasaun maibé rezultadu ikus impata 0-0, nune’e ekipa rua aumenta pontu ida (1) no rekolla pontu 13 hanesan ho AD SLB iha tabela klasifikasaun.
Ho rezultadu jogu rua referida, AD SLB Laulara okupa iha pozisaun dahuluk ho pontu 13, rezultadu manán haat (4) no impata ida (1) ho produtividade golu +44, Buibere iha pozisaun daruak ho pontu 13 no rekolla golu +42, enkuantu S’amuser iha pozisaun datoluk ho pontu 13 hafoin rekolla totál golu +37.
Jornalista: Natalino Belo
Editór: Xisto Freitas da Piedade
