OEKUSI, 24 Novembru 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, hamutuk kargu xefia sira no grupu agrikultór sira, domingu kalan ne’e abertura feira produtu lokál hodi festeza loron proklamasaun independénsia ba dala-50, 28 Novembru 1975- 28 Novembru 2025.
Iha ámbitu abertura feira produtu lokál ne’e, Régio Salu, fó-sai katak, atividade feira ne’e realiza ho fundu rihun $200, ho intensaun atu motiva grupu agrikultór sira inklui grupu feto potensiál sira, atu hatudu sira-nia produtu lokál ne’ebé durante prodús ona tuir kreatividade ida-idak nian. Montante orsamentu ne’e mos, Autoridade RAEOA preve ba selebrasaun loron proklamasaun
“Tema prinsipál ba tinan ne’e, feira produtu lokál no reforsa ekonomia rejionál, ne’e tema ida liga malu, ita hatudu poténsia lokál atu ita koeziste iha merkadu rejionál, ne’e la’ós ita tuur-tuur ita foti, maibé ne’e ita festeza tinan ida nian, komisaun gasta osan, ne’ebé ha’u espera feira tinan ne’e, ita bele gasta despeza importante rihun $200 ba komisaun tinan ne’e, espera labele sai de’it despeza atu monu leet iha estrada-ibun, maibé ita tenke konsiente, ita hakarak ka lakohi ho ZEEDOA nu’udar zona ekonomia espesiál, ita tenke koeziste iha merkadu ekonomia rejionál,” nia hateten iha abertura feira produtu lokál, ne’ebé hala’o iha 01 de Maiu Palaban, domingu kalan ne’e.
Notísia relevante:MKI sei organiza feira komérsiu internasionál Dili durante loron-lima
Bainhira ita la koeziste, nia dehan, ita labele ejize demais katak, ami tenke zona espesiál, tinan-10 ita ko’alia, Oekusi tenke zona espesiál maibé agora ita la koejiste iha ekonomia rejionál di’akliu ita bolu lalais investór sira mai atu kelola (jere) ita-nia Oekusi nia rikusoin naturál sira no produsaun haree iha Oekusi, maibé nu’udar Oekusi-oan sei la konkorda.
“Ha’u rasik sempre halo auto-krítika, bainhira seidauk tama iha sistema, katak iha tinan hira kotuk liubá, kuandu iha pameran (feira) hanesan ne’e, ita hasoru feto potensiál sira ne’ebé koñesidu ona hanesan grupu AFMEF, sira lori homan no Taís, maibé tinan-10 depois, ita halo feira hanesan ne’e sira-nia homan no Taís ne’e sei nafatin, laiha valór ne’ebé aumenta, ita ko’alia koezisténsia ekonomia rejionál,” nia afirma.
Kona-ba merkadu ASEAN, daudaun ne’e tenke preparadu ona, tanba bainhira partisipa eventu ruma iha nasaun viziña sira aprezenta produtu sira-ne’e, ba hanesan membru sosiedade ekonómiku ASEAN, ema sei haree Timor-Leste la hanesan uluk, tanba sei ba hanesan autór ekonomia estratéjiku ba ASEAN.
“Tan ne’e ita nu’udar lideransa iha Oekusi hamutuk ho funsionáriu hotu, tenke koloka ita-nia pensamentu iha ejizénsia diresaun globál foun ida-ne’ebé estratéjiku,” nia fó hanoin.
Notísia relevante:Feira komersiál TLAUCON2025 sai plataforma promove produtu no atrai investimentu
Iha biban ne’e, Diretór Diresaun Rejionál Komérsiu no Indústria, Orlando Quelo, grupu produtu lokál na’in-sira, ne’ebé partisipa iha feira produtu lokál ne’e, mai husi grupu indústria hamutuk 15 hodi aprezenta produtu ai-han tradisionál sira, jogu fila liman ka kere-kere hamutuk 10, restorante 11, karosa sia (9), no grupu feto potensiál aprezenta Taís Oekusi, no grupu kafetária sira.
Aliende ne’e, komisaun organizadora mós organiza kompetisaun sira hanesan, kompetisaun fashion show aprezenta kada diresaun no departamentu sira iha administrasaun Oekusi, kompetisaun artista lokál sira ba de’it tinan-17 mai karaik, kompetisaun kualidade stand ba partisipante sira, kompetisaun diskursu públiku ne’ebé komisaun define ona ho tema rua, primeiru ‘eleva rekursu umanu hodi kontribui ba dezenvolvimentu iha RAEOA ba futuru’ no tema daruak mak ‘dezenvolvimentu ekonomia lokál RAEOA Timor-Leste hasoru ekonomia globál iha kontextu rejiaun ASEAN’.
Iha mós kompetisaun tradisionál dada tali, komposta husi nível ensinu sekundáriu sira ba feto no mane sira, kompetisaun entre diresaun sira, kompetisaun dada tali ba suku 20 iha Oekusi, sa’e bua, soru-taís, homan, no ikusliu mak kompetisaun kulinaria ba de’it mane sira.
“Ne’ebé, atividade ne’e sei la’o semana ida, hahú ohin domingu sei enserra iha 28 Novembru kalan, hodi kontinua kedas fahe prémiu ba manán na’in-sira,” nia informa.
Notísia relevante:Loron Proklamasaun Independénsia: Momentu reflesaun no kompromisu ba futuru
Entretantu, tuir observasaun jornalista Ajénsia Tatoli,I.P, nota katak, atividade feira produtu lokál ne’e, hetan seguransa másima husi Komandu Polísia Nasionál Timor-Leste (PNTL) Oekusi.
Jornalista: Abílio Elo Nini
Editór: Rafael Ximenes de A. Belo
