MCI disemina dekretu lei lisensiamentu indústria no prosedimentu atribuisaun iha Tilomar
DILI, 24 Novembru 2025 (TATOLI) – Ministériu Komérsiu no Indústria (MCI, sigla portugés) divulga dekretu lei lisensiamentu indútria, baze indústria no prosedimentu atribuisaun ba lisensa no vistória iha Postu Administrativu Tilomar, Munisípiu Kovalima.
Dekretu lei tolu ne’ebé Diresaun Jerál Indústria (DJE) hamutuk ho Gabinete Apoia Juridiku (GAJ) disemina mak hanesan; Dekretu Lei Nú.90/2023, 27 Dezembru kona-ba Lisensiamentu Indústria no Dekretu Lei Nú.91/2023, 27 dezembru 2023 Baze Indústria no Dekretu Governu Nú. 4/ 2024, Dezembru, Regulamentu kona-ba Prosidementu atribuisaun ba lisensa no vistória ba iha ambitu lisensiamentu setoriál ba atividade sira indústria no aprovasaun respetivu ba modelu formuláriu ho nia impresaun sira.
Workshop ne’e realiza durante loron ida iha salaun administrasaun Tilomar, Suku Mau Demo, Aldeia Besak Oan, Postu Administrativu Tilomar, Salele, Munisípiu Kovalima.
“Dekretu Lei Lisensiamentu Indústria, Baze Indústria no Dekretu Governu Regulamentu kona-ba Prosidementu atribuisaun ba lisensa no vistória, sai hanesan fundamentu ka baze legál ida atu regula atividade hotu-hotu ne’ebé iha relasaun ho setór industriál, liuliu ba atór emprezariál sira,” Diretór Nasionál Lojístika, Maria Rita S.Q. Sarmento, esplika bainhira reprezenta Diretór Jerál Indústria.
Tanba razaun ne’e, atór emprezariál sira presiza hatene detalladamente konteúdu Dekretu Lei hirak-ne’e, nune’e sira bele kompriende klaru obrigasaun no direitu sira-nian, atubele prevene risku sira hodi hasees-an husi infrasaun.
Entretantu, iha workshop divulgasaun Dekretu-Lei ne’e, abertura husi reprezentante PAM Suai, Filomeno Cardoso, Sekretáriu III ba Asuntu Sosiál, ne’ebé esklarese kona-ba atividade indústria ne’ebé emprezáriu sira halo.
Liután Sekretáriu III, rekonese katak durante tempu naruk, setór ne’e seidauk iha mekanismu klaru atu regulariza atividade negósiu sira nian. Tanba razãun ne’e, nia agradese ba Ministériu Komérsiu no Indústria, ne’ebé disponibiliza tempu atu mai divulga Dekretu-Lei tolu (3) ne’e, importante tebes ba orientasaun no regulariza atividade industriál sira.
Workshop divulgasaun Dekretu Lei ne’e modera husi Gregorio da Silva, Koordenadór Gabinete Jurídiku, no oradór sira ne’ebé mak espretu iha área Diretu nian mak Guido Moniz Gonçalves no Mariano Ribeiro.
Metodelojia uza mak partisipatória, tanba envolvimentu partisipante iha diskusaun grupu hodi identifika hamutuk pergunta sira ne’ebé prepara ona husi oradór sira no rezultadu husi diskusaun sei aprezenta fali.
Partisipante sira mai husi APA Tilomar, emprezária sira, estudante Sekundaria Públika Filiál Tilomar, Reprezentante Komandante PNTL Eskuadra Tilomar, F-FDTL, Reprezentante BCTL, lina ministeriál sira, komunidade no juventude.
TATOLI
