DILI, 25 Novembru 2025 (TATOLI)—Empreza Irmaun Sandobe Unipesoál, Lda, entrega projetu reabilitasaun terminál pasajeiru Portu Dili ba Governu liuhusi Ministériu Transporte Komunikasaun hodi fó kompeténsia ba Autoridade Portuáriu Timor-Leste hala’o ninia atendementu pasajeiru nasionál no internasionál.
“Iha okaziaun ida-ne’e marka pasu konkretu ida husi Governu nia kompromisu atu hadi’a di’ak liután setór transporte marítims no liuliu atu bele fasilita halo atendementu di’ak-liu ba ita-nia sidadaun sira,” Ministru Nanetelu informa ba jornalista sira iha entrevista, iha Portu Dili, ohin.
Ho rehabilitasaun terminál ne’ebé sei entrega ba APORTIL, importante tebes tanba sei garante espasu ida-ne’ebé sufisiente, seguru no adekuadu ba sidadaun sira-neʼebé sei halo viajen ba Oekusi no Ataúru inklui mós pasajeiru internasionál sira-ne’ebé mai ho ró kruzeiru.
Tamba ne’e, Governante ne’e dehan, sira mós halo salaun ida hodi halo atendementu ba billete fó asisténsia ba pasajeiru sira hodi hein ró iha ne’é no salaun ne’e sei akumula pasajeiru nasionál tantu internasionál, depende ba APORTIL mak halo jestaun.
“Normalmente funsionamentu servisu iha fatin ida-ne’e sei hala’o kedas ona tanba ohin ita entrega ona ba sira no amu mós fó ona bensaun. Eskritóriu APORTIL sei muda fali mai iha ne’e, tanba ne’e husu ba sira atu uza fatin ne’e ho di’ak no kuidadu,” nia dehan.
Projetu reabilitasaun terminál pasajeiru portu Dili ne’e implementa husi empreza Irmaun Sandobe Unipesoál, Lda, durante fulan 10 ho orsamentu hamutuk rihun $500.
Jornalista : Alexandra da Costa
Editór : Cancio Ximenes
