DILI, 26 Novembru 2025 (TATOLI)—Federasaun Futeból Timor-Leste (FFTL), Kuarta ne’e, lansa Loja Ofisiál FFTL ho objetivu fa’an atributu ofisiál futeból hodi hakbesik futeból ba komunidade.
Prezidente FFTL, Nilton Gusmão esplika kriasaun loja ne’e bazeia ba preokupasaun husi komunidade hadomi futeból ne’ebé difísil asesu atributu futeból liuliu farda selesaun nasionál, tan ne’e liuhusi desizaun koletiva deside loke loja referida hodi fasilita komunidade.
“Labele haree ba nia funsaun maibé haree ba vontade ka objetivu kria fatin ida-ne’e tanba fó biban ba ita hotu ne’ebé hakarak apoia selesaun nasionál bele hetan ekipamentu ofisiál iha-ne’e (iha loja ne’ebé lokaliza iha sede FFTL),” Nilton hateten iha Bairros dos Grilos.
Nilton salienta estrutura atuál hafoin simu responsabilidade iha FFTL ho kedas misaun ida atu transforma futeból sai orgullu nasionál ne’ebé iha signifikadu luan.
“Ema hotu sei hatais roupa ne’ebé hanesan ho jogadór selesaun nasionál sira uza. Ne’e katak reprezenta kontribuisaun husi sosiedade hadomi futeból ba ita-nia nasaun,” nia subliña.
Entretantu, loja FFTL prepara farda ofisiál selesaun nasionál feto no mane, jaket inklui atributu seluk ligadu ho futeból. Serimónia lansamentu partisipa husi membru ezekutivu, prezidente asosiasaun futeból munisipál, estruturu FFTL inklui konvidadu sira.
Jornalista: Natalino Belo
Editór: Xisto Freitas da Piedade
