Marí Alkatiri prefere Governu konsidera krítika husi sosiedade sivíl no akadémiku sira
DILI, 28 Novembru 2025 (TATOLI)–Sekretáriu Jerál Partidu Frente Revolusionária Timor-Leste Independente (FRETILIN), Marí Alkatiri prefere Governu konsidera krítika hosi sosiedade sivíl no akadémiku sira tanba liuhusi krítika Governu bele hadi’a no dudu dezenvolvimentu bá-oin.
“Ita presiza hanoin krítiku atu ajuda dudu nasaun ida-ne’e bá-oin. Lahó hanoin krítiku sei la ajuda dezenvolvimenti nasaun,” Marí Alkatiri dehan ba jornalista sira, hafoin partisipa selebrasaun Loron Proklamasaun Independénsia RDTL ba da-50 iha Palásiu Governu, Sesta ne’e.
Nia subliña mudansa sira-ne’e tenke maihusi kritika no krítika la’ós ho kilat ka fatuk maibé krítika ne’e mai ho ideia konstrutiva sira-ne’ebé kontribui ba dezenvolvimentu nasaun.
“Mudansa maka ida-ne’e. Ita tenke iha massa krítika ne’ebé maka’as, la’ós atu kaer kilat, la’ós atu kaer fatuk, maibé massa krítika ida-ne’ebé maka’as no konstrutivu hodi kontribui ba dezenvolvimentu nasionál,” ex Primeiru-Ministru tenik.
Jornalista: Osória Marques
Editór: Xisto Freitas da Piedade
