OEKUSI, 01 Dezembru 2025 (TATOLI) – Diresaun Rejionál Edukasaun no Solidariedade Sosiál, Rejiaun Administrativa Espesiál Oekusi Ambeno (RAEOA), hasai sirkulár ida hodi husu ba estudante finalista 9 ano sira iha sub-rejiaun Oésilo Pássabe no Nítibe atu kontinua matrikula de’it iha Eskola Sekundária Jerál Públiku (ESGP, sigla portugés) paralelu tolu, ne’ebé antes ne’e Ministériu Edukasaun estabelese ona hanesan ESGP Leobeno no Puinbeno iha Oésilo, no ESGP Haobeno iha Nítibe.
Karta sirkulár ne’ebé Ajénsia Tatoli,I.P asesu, ho númeru Númeru: 91/Sirk-DRESS/RAEOA-TL/XI/2025, ne’ebé asinatura direita hosi Diretór Diresaun Rejionál Edukasaun no Solidariedade Sosiál Oekusi, Vincencio Cono.
Notísia relevante:Edukasaun Oekusi hahú prova finál ba estudante sextu anu ho literásia-numerásia
Iha sirkulár referidu, apela ba diretór no adjuntu diretór eskola sira, koordenadór eskola, responsavel eskola sira, GAT nível ensinu hotu, KIAR iha nível ensinu hotu-hotu, líder komunitáriu, igreja, no komunidade entidade edukativa sira liu-liu estudante finalista nível ensinu báziku tinan-2025, ho asuntu matrikula estudante foun 2026 ne’ebé klasifikasaun importante, pertinente no nesesáriu atu kumpre, la autoriza atu kontinua estudu iha eskola sekundáriu sira iha sub-rejiaun Pante Makasar.
“Bazeia ba asuntu iha leten, nu’udar Diretór Rejionál Eduksaun no Solidariedade Sosiál, haree ba pasadu no prezente katak “númeru estudante iha kada eskola la balansu ho manorin sira durante prosesu ensinu-aprendizajén, ho nune’e atu kumpre diploma ministeriál númeru 23/2024, loron 13 fulan-Agostu, aprova a organização tranzitória dos Estabelecimentos de Ensino Secundário e a Rede Escolar do Ensino Secundário,” define ona ESGP paralelu Puinbeno, ESGP paralelu Haobeno no ESGP paralelu Leobeno sai ona filiál tranzitóriu,” sita iha sirkulár ne’ebé Ajénsia Tatoli asesu iha Oekusi, ohin.
“Tanba ne’e, atu ekilibra númeru estudante iha kada eskola, husu ba dirijente eskola, lidér komunitáriu, profesór, estudante, relijiozu sira no entidade edukativa, espesiál ba estudante finalista 9ºAno tinan-2025 parte Nitibe, Pássabe no Oesilo (pertense foho) atu matrikula de’it iha ESGP sira iha postu administrativu idak-idak, hirak-ne’ebé mak hakarak atu mai iha vila Pante Makassar só eskola privada ka misaun nian, husu atu kumpre no la halo negosiasaun oi-oin, kona-ba eskola tékniku vokasionál, oras ne’e ETV São João Paulo II Pássabe nakloke tebes atu estudante sira ba rejistu,” informa iha sirkulár referida.
Notísia relevante:Edukasaun Oekusi emite sirkulár regula legalizasaun diploma no deklarasaun kréditu
Diretór Diresaun Rejionál Edukasaun no Solidariedade Sosiál Oekusi, Vincencio Cono, esplika, katak, sirkulár refere liu ba ensinu báziku, idak-idak hatene nia agrupamentu, esepsaun sira-ne’ebé hakarak transferénsia, esepsaun ida-ne’ebé ho razoavél, tanba atu halo ekilibriu, númeru alunu iha kada eskola ba nível hotu.
“Estatutu eskola paralelu tolu ne’e nu’udar filiar tranzitóriu, tan ne’e depende ba manorin no kanorin sira, atu kreativu, estudante sira labele mai iha vila, tanba sirkulár ne’e ita hasai ba hot-hotu atu kumpre, ne’e tanba desentraliza edukasaun ba to’o baze, tanba iha Janeiru 2026 ita sei koloka profesór ba ensinu sekundáriu jerál no tékniku vokasionál kobre mós eskola paralelu tolu ne’e,” nia informa.
Relasiona ho karta sirkulár ne’e, Antãon Lafo, nu’udar Adjuntu Diretór Ensinu Báziku Setrál (EBC, sigla portugés) Pássabe, promete hodi kumpre no obedese tuir ierárkia.
“Nu’udar manorin no dirijente eskola tenke kumpre no obedese, tanba bainhira iha ierárkia serbisu, entaun subordináriu ne’e tenke obedese, tuir buat ne’ebé mak lei hatuur ona no sirkulár mós ami asesu ona, katak profesór tenke iha dixiplina, pontualidade,” nia hateten.
Notísia relevante:Edukasaun Oekusi identifika ona suku ualu atu harii Ensinu Pré-Eskolár iha 2026
Entretantu, eskola paralelu tolu ne’e mak hanesan, Eskola Sekundária Jerál Públiku Puinbeno lokaliza iha suku Usitasa’e, Eskola Sekundária Jerál Públiku Leobeno lokaliza iha suku Bobometo perténsia sub-rejiaun Oésilo ho nia sentru mak Eskola Sekundáriu Públiku Baqui, no mós Eskola Sekundária Gerál Públiku Haobeno lokaliza iha suku Lela-Ufe sub-rejiaun Nítibe ho nia sentru mak Eskola Sekundáriu Públiku Palaban.
Jornalista: Abílio Elo Nini
Editór: Rafael Ximenes de A. Belo
