Prezidente Repúblika entrega sertifikadu ba feto emprezariál 29

DILI, 11 Dezembru 2025 (TATOLI)–Prezidénsia Repúblika liuhusi Xefe Kaza Sivíl, Jesuína Maria Ferreira Gomes, kinta ne’e, entrega sertifikadu no apoiu negósiu ba feto 29 ho defisiénsia, hafoin tuir formasaun jestaun finanseira loron rua nia laran ne’ebé hetan apoiu husi Banku ANZ.

Xefe Kaza Sivíl, Jesuína Maria Ferreira Gomes, hateten vizaun Prezidente José Ramos-Horta nian ba mandatu 2022-2027, hodi subliña katak inkluzaun loos ne’e la’ós de’it kona-ba edukasaun.

“Atu empodera ema, la’ós lori formasaun de’it, maibé fasilita oinsá imi bele komesa imi-nia negósiu,” Jesuína hateten iha nia diskursu iha serimónia entrega sertifikadu iha Palásiu Prezidensiál Nicolau Lobato, Bairru Pite.

Inisiativa ne’e parte husi estratejia boot-liu ne’ebé lidera husi Unidade Empoderamentu Ekonomia Feto, ne’ebé to’o ona emprezária ki’ik liu 600 iha munisípiu hitu (7) mak hanesan Likisá, Dili, Ermera, Baukau, Manatutu, Aileu no Bobonaru.

Efeitu multiplikadór husi apoiu ba feto sira-ne’e hodi nota katak rendimentu uma kain husi empreza ki’ik sira rezulta empoderamentu ba feto, ne’ebé kontribui diretamente ba finansa família, hadi’a edukasaun, saúde no hahan ba labarik sira inklui feto ho defisiénsia importante tebes atu asegura katak asesu ba rekursu nasionál sira fahe hanesan entre sidadaun hotu.

Iha okaziaun ne’e, benefisiária Madalena da Costa hateten inisiativa ne’e nu’udar oportunidade osan-mean, hodi hato’o agradesementu ba gabinete Prezidente Repúblika ne’ebé lolo liman hodi tulun grupu marjinalizadu ne’ebé dala barak ema haluha.

“Ami sente úniku no valorizadu tebes husi Gabinete Prezidente Repúblika tanba ita-boot sira bele hateke hetan feto maluk defisiénsia sira,” nia hateten.

Ho nune’e, nia espresa esperansa katak apoiu vitál ne’e ikus mai sei habelar atu to’o ba feto maluk sira ho defisiénsia ne’ebé hela iha área rurál.

Jornalista : Hortencio Sanchez

Editór      : Cancio Ximenes