DILI, 24 Dezembru (TATOLI)-Atividade ekonómika iha merkadu Taibessi iha loron boot selebrasaun festa Natál nian la hanesan ho loron baibain, tanba movimentu kompradór sira iha fatin ne’e la’o maka’as.
Negosiante Feliciano Soares bele hetan lukru di’ak iha tempu Natál, tanba loron ida ema sosa nia produtu to’o $30, kompara ho loron baibain dalaruma hetan de’it $5 to’o $10, hodi bele uza ba nesesidade família.
“Ami fa’an modo-tahan, liis no foos rai. Ami komesa fa’an iha dadeer ne’e hetan ona $20”, nia hateten ba Tatoli iha merkadu Taibessi, ohin.
Nune’e mós vendedora Jacinta Soares reforsa katak iha loron boot bele hetan rendimentu di’ak tanba kompradór barak mak sosa produtu ne’ebé fa’an.
“Ema mai hola barak mak senoura, fehuk europa, koto-nurak. Iha loron ida bele hetan $15 to’o $20, loron baibain la hanesan ne’e”, nia dehan.
Nia mós fa’an ai-fuan fresku hanesan abakate, ai-nanas no seluk tan ne’ebé folin tebes.
Estela Guterres na Agostinha de Carvalho ne’e fa’an katupa homan relata katak to’o loraik sira bele hetan to’o $35.
Tuir observasaun jornalista Tatoli, negosiante sira homan no fa’an katupa, nuu, na’an fresku hanesan karau, manu lokál, no modo-tahan no produtu sira seluk no iha komparadór barak mak sosa hodi prepara ba festeza loron Natál.
Jornalista: Nelson de Sousa
Editora: Maria Auxiliadora
