Prezidente Repúblika nia mensajen ba Natál: Unidade nasionál dura nu’udar fundasaun
DILI, 24 Dezembru 2025 (TATOLI) – Prezidente Repúblika, José Manuel Ramos-Horta, hato’o mensajen iha selebrasaun Natál no Tinan Foun hodi alerta katak orasaun ba festa ne’e bootliu mak unidade nasionál no pás nune’e dura nu’udar fundasaun ne’ebé metin ba nafatin.
Iha tinan 2025 nia laran, Xefe Estadu haktuir katak, timoroan hotu viajen nu’udar povu ida de’it, hasoru dezafiu sira ho reziliénsia no selebra progresu ho unidade.
“Nu’udar imi-nia Prezidente, ha’u-nia orasaun Natál nian ne’ebé bootliu maka atu unidade nasionál no pás ne’ebé dura sai ita-nia fundasaun ne’ebé metin. Mai ita fó liman ba sira ne’ebé sente mesak, ajuda sira-ne’ebé presiza, no simu ema hotu ho laran nakloke ne’e mak espíritu loloos Natál nian,” Xefe Estadu hato’o mensajen ne’e liuhusi nota imprensa ne’ebé TATOLI asesa, kuarta ne’e.
Prezidente Repúblika konsidera Natál mak tempu sagradu ida, tempu ne’ebé fuan sira iha mundu tomak hanoin hikas kona-ba mensajen forte ba umilde moris foun iha Belém.
Nune’e mós kona-ba naroman iha nakukun laran, kona-ba pás envezde konfrontu no domin ba malu.
Mensajen ne’e ko’alia kle’an kona- ba timoroan sirania istória rasik no espíritu koletivu tanba nasaun ida-ne’ebé la’o tempu naruk iha nakukun laran, matadalan husi naroman fiar no esperansa nian ne’ebé metin ba loron-foun ida ne’ebé di’akliu tanba loron-foun ida-ne’e mak timoroan nian atu harii hamutuk.
“Ba Timor-Leste nia oan sira, ne’ebé sira-nia ksolok hakonu ita-nia uma laran: hein katak imi-nia hamnasa kontinua sai lian ba ita-nia nasaun nia promesa. Imi mak ita-nia prezente bootliu hotu no ita-nia futuru. Ba ita-nia ferik no katuas sira, ne’ebé lori matenek ba ita-nia viajen naruk: atu imi hetan onra no haleu ho domin no respeita. Ba família timoroan ida-idak: atu imi-nia uma sira hetan bensaun kmanek hamutuk no gratidaun ne’ebé kle’an.”
Iha tempu ksolok nian ida-ne’e, Xefe Estadu husu timoroan hotu halo orasaun besikliu ba sira ne’ebé lori todan—sira ne’ebé moras, sira-ne’ebé luta, no sira ne’ebé triste tanba lakon ema ne’ebé sira hadomi. Espera katak sira hetan konfortu iha sira-nia komunidade nia hamutuk no forsa foun iha esperansa ne’ebé maka tempu ida-ne’e reprezenta.
“Bainhira haree ba Tinan Foun, mai ita lori ba oin naroman Natál nian. Husik ida-ne’e orienta ita-nia asaun sira ba justisa ne’ebé bootliu, kompaixaun ne’ebé kle’an liu, no dezenvolvimentu sustentável ba ema hotu. Hamutuk, mai ita kontinua harii Timor-Leste ida ne’ebé sidadaun ida-idak bele moris iha dignidade no pás nia laran.”
“Ha’u dezeja ba imi hotu Natál ida ne’ebé nakonu pás kristu nian ne’ebé kle’an, no Tinan Foun 2026 ne’ebé nakonu ho saúde, prosperidade, no susesu komún. Maromak haraik bensaun ba imi ida-idak, no Maromak haraik bensaun ba Timor-Leste,” Xefe Estadu nia mensajen ba selebrasaun Natál tinan ida-ne’e no Tinan Foun 2026 nian.
Jornalista: Hortencio Sanchez
Editór: Evaristo Soares Martins
