DILI, 13 Janeiru 2026 (TATOLI)—Ministru Planeamentu no Investimentu Estratéjiku, Gastão Francisco de Sousa, husu Ministru Asuntu Kombatente Libertasaun Nasionál, Gil da Costa Monteiro “Oan-Soru”, atu aprezenta orsamentu adisionál ba projetu konstrusaun Memoriál Masakre Santa Krús hodi halo diskusaun.
“Monumentu Memoriál Santa Krús paradu, tanba hein projetu na’in tenke mai aprezenta iha Konsellu Administrasaun Fundu Infraestrutura (KAFI), tanba adisionál ne’e boot lahalimar. Na’in projetu Ministériu Asuntu Kombatente Libertasaun Nasionál maka tenke aprezenta iha KAFI para ita diskute, maibé to’o agora seidauk lori mai,” Ministru Gastão dehan jornalista sira iha resintu Palásiu Governu, Kinta ne’e.
Ministru Gastão hateten estatutu de’it maka sei problema to’o agora, tanba ne’e Ministériu Asuntu Kombatente Libertasaun Nasionál (MAKLN) liuhusi KAFI hein bainhira mak mai aprezenta, basá konstrusaun ne’e lori tempu naruk ona.
Entretantu, Ministru Asuntu Kombatente Libertasaun Nasionál, Gil da Costa Monteiro “Oan-Soru” sei ko’alia ho KAFI atubele buka solusaun ba Monumentu Memoriál Santa Krús ne’ebé mak nia konstrusaun la’o neneik loos.
Notísia relevante: KAFI diskute fali prosesu konstrusaun Monumentu Memoriál Masakre Santa Krús
“Maibé, einprinsípiu, ami sei ko’alia fali ho KAFI para haree situasaun ida-ne’e atubele fó solusaun tanba solusaun ne’e buat rua de’it; halo ka lae no oinsá bele halo,” Ministru Oan-Soru tenik.
Oan-Soru hatutan Monumentu Santa Krús nia prosesu daudaun ne’e iha hela Fundu Infrastrutura nian.
“Obra Memoriál Masakre Santa Krús ne’e todan liu fali povu nia luta ida iha tinan 24 ba ukun an no prosesu sira-ne’e hotu tanba ita rasik kria hela difikuldade sira-ne’e, ne’ebé difikulta tiha pensamentu hotu-hotu,” nia esklarese.
Nia informa tanba estátua halo iha nasaun Portugál maibé informasaun mai fali dehan la halo fali iha-ne’ebá.
“Estátua ne’e prodús fali iha Xina no haruka tiha bá Portugál mak haruka mai fali iha Timor. Tan ne’e, tenke hasoru difikuldade barak,” nia informa.
Maibé, Oan-Soru hateten, prosesu hotu-hotu tenke iha orsamentu maibé Ministériu Asuntu Kombatente Libertasaun Nasionál foin simu rekezitu sira-ne’e hotu.
“Orsamentu ami foin simu nia rekezitu sira-ne’e. Ne’ebé, ami sei enkontru filafali hodi haree,” nia esplika.
Nia subliña orsamentu ne’e sei la aloka foun, no orsamentu ne’e responsabilidade husi Fundu Infrastrutura nian.
Tuir Oan-Soru katak infomasaun ne’ebé mak maihusi Empreza Bobolait no mós Komité 12 Novembru, rua ne’e hotu-hotu laiha detallu tanba ida-idak mai ko’alia ninian.
Antes ne’e, Governu aloka millaun $1.4 ba projetu konstrusaun Memoriál Masakre Santa Krús ne’e. Projetu referidu hahú iha 22 Setembru 2021 to’o 2022, maibé la konsege konkluidu nune’e kontinua estende ba 2023, maski nune’e to’o ohin loron seidauk iha rezultadu.
Jornalista: Osória Marques
Editór: Xisto Freitas da Piedade
