OEKUSI, 29 Janeiru 2026 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, konvida instituisaun akadémika, Dili Institute of Tecnology, Kampus Rejionál Oekusi (DITKREO) atu partisipa hodi integra-aan ba iha Programa Movimentu Empreendedorizmu, nune’e bele dezenvolve turizmu komunitária iha Oekusi.
Régio Salu, hato’o nia rekomendasaun ne’e, bainhira sai oradór prinsipál iha semináriu, ne’ebé organiza husi DITKREO ho tema ‘‘Estratéjia dezenvolvimentu mikro pequena empreza no impaktu ba kreximentu ekonomia rejionál périodu 2025-2030’, ne’ebé hala’o iha Oekusi, kuarta ne’e.
“Autoridade hamosu no lansa ona ba públiku inklui Primeiru-Ministru, Programa Movimentu Empreendedorizmu Oekusi (Gerakan kewirausaha Oekusi), ne’e movimentu ida atu serbisu hamutuk akompaña no promove insentiva indústria inisiativa mikro pequeno, médiu indústria iha Oekusi, ohin ha’u hato’o de’it DITKREO bele hola parte mós ba programa ne’e, ha’u hakarak imi foku ba turizmu,” nia hateten iha salaun edukasaun Oekusi.
Líder másimu RAEOA ne’e énfaze, ho programa ne’e, atu halo agrikultór sira sai merkadu mós, tanba durante ne’e ema barak preokupa, merkadu mak ida-ne’ebé, maibé merkadu loloos mak povu, entaun empreendedorizmu tenkiser lori ba besik povu.
“Ha’u husu ba DIT tanba iha enkuadramentu ba programa ne’e ho nia fundu rasik, instituisaun sira-ne’ebé hala’o serbisu ba área empreendedorizmu formasaun kapasitasaun no promosaun empoderamentu bele asesu fundu ne’e, atu bele halo buat ruma, iha tinan ne’e ita sei hahú ho fundu rihun $700,” nia hateten.
Notísia relevante:Programa Movimentu Empreendedorizmu, Xanana: Reziliente mak save ba susesu Oekusi
Tuir nia haree, tanba DIT dezenvolve programa turizmu, entaun presiza hetan apoia fundu husi Governu atu reforsa-tan inisiativa ne’ebé di’ak ba Oekusi.
“Ha’u simu ona ita-boot sira-nia proposta atu dezenvolve tan programa empreendedorizmu ne’e no sei asesu fundu ne’e, no ita-boot sira tenke tuun halo serbisu laboratóriu ba ho agrupamentu, tanba programa ne’e iha penekanan (énfaze) tolu ba kualker benefísiu ne’ebé asesu fundu ne’e, mak fundu espesiál ba empreendedorizmu sosiál no dezenvolvimentu ekonómiku. Fundu ne’e sei apoia ba setór privadu ne’ebé halo investimentu ho karatér sosiál, setór kooperativa sira-ne’ebé hakarak investe iha área produtivu, família sira iha sidade laran, hakarak halo kafetária ou transforma uma sai penginapan (alojamentu) inklui mós restorante sira no inisiativa seluk tan,” nia hateten.
Autoridade RAEOA ne’e orgullu, tanba semináriu ne’e importante, atu Governu mós bele habelar nia polítika kona-ba movimentu empreendedorizmu iha Oekusi ba nível akadémiku.
Iha biban ne’e, Diretór DITKREO, João Muni, agradese tanba parte akadémiku iha nia esforsu atu bele fó introdusaun koñesimentu ba estudante sira hotu, liuliu iha asuntu finansa, kontabilidade no jestaun nian, katak mikro pequena empreza ekonomia sai hanesan baze fundamentál, ne’ebé moris iha sosiedade nia leet.
Tanba ho Programa Movimentu Empreendedorizmu bele reforsa polítika akadémika liu-liu ba asuntu ekonomia nian.
“Ita haree husi aspetu rejionál, Oekusi iha ninia unifika rasik, tanba ne’e semináriu ne’e importante hodi konvida Prezidente Autoridade nu’udar oradór prinsipál, tanba estudante sira mak futuru nasaun ba ekonomia ninian, entaun liuhusi eventu ne’e, bele relata progresu, dezafiu inklui planu polítika Autoridade nian ba foinsa’e sira,” nia hateten.
Notísia relevante:RAEOA sei inísia programa ‘Movimentu Empreendedorizmu’ iha 2026 ho objetivu lima
Jornalista: Abílio Elo Nini
Editór: Rafael Ximenes de A. Belo
