DILI, 04 Fevereiru 2026 (TATOLI)—Komisaun F iha Parlamentu Nasional ne’ebé trata asuntu Edukasaun, Saúde, Seguransa Sosiál no Igualdade Jéneru halo fiskalizasaun ba HNGV hodi haree direta pasiente dengue ne’ebé baixa iha sala pediatria, no rekomenda ba HNGV katak familia sira bainhira vizita pasiente tenke uza máskara.
“Ohin, ami ekipa komisaun F mai vizita HNGV hodi harree direita pasiente moras dengue ne’ebé baixa iha sala pediatria, entaun husi sala pediatria no perinatolojia bebé moris mai ho kondisaun ne’ebé mak presiza atende husi profisionál saúde sira. Ami haree katak iha sala pediatria 1, pediatria 2 no pediatria 3, entaun ami rekomenda maka’as ba dirijente HNGV sira liuliu ba sala pediatria, familia sira bele tama karik uza máskara nune’e labele fo impkatu ba labarik sira-ne’ebé mak mai ho kondisaun fraku,” Prezidente Komisaun F iha PN, Maria Brareto, hateten ba jornalista sira iha HNGV, ohin.
Hafoin vizita sala pediatria, Komisaun F mai fali iha sala emerjénsia hodi identifika katak iha HNGV haree liu ba kazu moderadu no mós grave, kazu dengue ne’ebé mak kmaan ne’e HNGV halo transferénsia ba ospitál temporáriu kuarentena Tasi-Tolu.
“Iha parte seluk, ami identifika Infus pump ne’ebé mak iha, banhira kazu dengue maka’as ita-nia ekipamentu Infus pump la to’o no labele atende hotu. Tanba ne’e, ami rekomenda no sei identifika orsamentu husi HNGV no orsamentu husi MS no INFPM, ida-ne’ebé mak disponivel atu bele rekomenda ba Ministériu Saúde atu kompra urjente ba ekipamentu sira-ne’e,” nia dehan.
Nia haktuir, obejtivu vizita ne’e atu haree liu ba fasilidade sira liuliu atendimentu ba pasiente labarik sira ne’ebé ho kazu dengue.
“Kona-ba ami-nia haree ba rekursu umanu sira-nia atendimentu di’ak ba pasiente sira, tanba ne’e husu ita hotu atu kolabora malu hodi servisu ne’e ho di’ak,” nia hatete.
Iha fatin hanesan, Diretór Servisu Apoiu Diagnóstiku no Terapéutiku Iha HNGV, Vidal de Jesus Lopes, hateten ohin komisaun F mai halo fiskalizasaun ba HNGV liuliu foka ba pasiene dengue ne’ebé mak baixa iha sala pediatria
“Sira haree no identiifika hodi hamosu rekomendasaun balun relasiona orsamentu balun atu sosa ekipamentu sira hanesan Infus pump ne’ebe sira husu atu sosa emerjénsia. Agora kazu dengue hahú iha loron 1 fulan-Janeiru to’o mai ohin loron rejista kazu hamuutuk 447 no husi numeru ne’e na’in-lima mak lakon vida,” nia dehan.
Nia subliña, kazu sira-ne’e referál husi Munispiu Ermera no Likisá nomos Sentru Saúde sira iha Dili laran hanesan Vera Krús, Bekora, Komoro no sentru súde Formosa.
Jornalista : Felicidade Ximenes
Editór : Cancio Ximenes
