OEKUSI, 11 Fevereiru 2026 (TATOLI) – Diretór Programa Nasionál Dezenvolvimentu Suku (PNDS) iha Rejiaun Administrativa Espesiál Oekusi Ambeno (RAEOA), João Bobo, fó-sai katak, prioridade PNDS ba 2026 ne’e, sei ezekuta projetu 22 maioria reabilitasaun estrada no edifikasaun kapela.
“Iha semana kotuk iha konklui ona deskusaun, ba prioridade tinan ne’e, iha projetu hamutuk 22, ne’e levantamentu dadús mós ita finaliza ona, ohin mak termina iha suku Taiboko, ne’ebé projetu 22 ne’e, balun reabilitasaun estrada, edifikasaun kapela, estensaun saladeaula no kanalizasaun bee-moos, maibé maioria estrada no edifikasaun kapela,” nia hateten iha Oekusi, ohin.
Notísia relevante:Ezekusaun fundu PNDS ba projetu 24 iha Oekusi atinje ona 96%
Ezekutivu ne’e esplika, tuir matadalan PNDS, projetu hirak-ne’e, komunidade sira mak propoin rasik prioridade projetu iha suku, PNDS fasilita de’it.
Tuir nia, kona-ba orsamentu fiksa ona, hamutuk rihun $931,000,00, ba suku 20 inklui suku foun Monemeko no Kutete. Kona-ba projetu anteriór ne’ebé ezekuta iha 2025, kuaze konklui ona falta de’it suku Naimeko no tuir planu sei finaliza iha Fevereiru ne’e.
“Projetu 22 ne’e ba suku 20, iha suku rua mak prioridade suku Usitaku ho Bene-Ufe hetan projetu rua, tanba tuir kalkulasaun tékniku katak sira-nia kritéria orsamentu boot, entaun fahe ba rua, ne’ebé suku rua ne’e sira hetan projetu rua-rua,” nia hateten
Notísia relevante:PNDS Oekusi aprova projetu rua hodi implementa iha suku Monemeko no Kutete
Autoridade ne’e informa, pedidu tranferénsia, parte PNDS submete ona ba nasionál hodi hetan aprovasaun husi Ministériu Administrasaun Estatál (MAE), atu enkamiña ba Ministériu Finansa (MF), nune’e bele halo tranferénsia orsamentu.
“Sekuandu tranferénsia mai ona, entaun ita hahú prosesu aprovizionamentu, entaun posibilidade konstrusaun ba projetu 22 ne’e ita bele hahú iha fulan-Abríl to’o Maiu, karik transfere fundu PNDS iha tempu-badak,” nia afirma.
Notísia relevante:Autoridade Bene-Ufe Nítibe espera PNDS Oekusi aselera konstrusaun EBF Bítila
Jestór sub-rejiaun Pante Makasar, Lorêncio da Cunha, rekomenda ba públiku atu hamutuk tau matan implementasaun projetu PNDS nia prezensa tanba kobre hotu suku to’o aldeia, nune’e bele garante kualidade.
“Ita agradese tanba prezensa PNDS la’ós iha urbana de’it maibé to’o kedas suku no aldeia sira, entaun presiza ema hotu kontribui atu monitoriza, hato’o ita-nia rekomendasaun sira liu-liu ba kualidade, tanba ita haree barak mak estrada, kanaliza bee-moos, ne’e korresponde duni povu nia preokupasaun, maibé barak mak la tinan aat fali, entaun husu ema hotu atu kontrola mós,” nia afirma.
Jornalista: Abílio Elo Nini
Editór: Rafael Ximenes de A. Belo
