OEKUSI, 23 Dezembru 2025 (TATOLI) – Ezekusaun ba fundu PNDS ba projetu regulár 22 inklui projetu adiosionál rua iha Rejiaun Administrativa Espesiál Oekusi Ambeno (RAEOA) daudaun ne’e atinje ona 96%, Diretór Programa Nasionál Dezenvolvimentu Suku (PNDS) Rejiaun Administrativa Espesiál Oekusi Ambeno (RAEOA), João Bobo, informa.
João Bobo, subliña, husi 96% ne’e hela de’it 4% atu kompleta ba 100% tanba projetu adisionál rua mak seidauk konklui iha suku Monemeko sub-rejiaun Pante Makasar no projetu ida iha suku Usitasa’e sub-rejiaun Oésilo.
“Tinan ne’e ita ezekuta projetu 24, regulár 22 aumenta projetu rua husi fundu adisionál ba suku foun Kutete no Monemeko. Projetu sira-ne’e nia alokasaun orsamentu husi nasionál mai PDNS Oekusi rihun $900-resin, maibé nia ezekusaun maioria konklui ona hela projetu rua mak konstrusaun sei la’o hela depois nia orsamentu mós sei iha valór boot, liu-liu projetu adisionál rua kapela ida iha suku Monemeko no kapela ida iha suku Usitasa’e, João Bobo iha Oekusi dehan, ohin.
Notísia relevante:Tinan ne’e, PNDS Oekusi implementa projetu 25 ho kustu rihun $900-resin
“Ne’ebé, ba projetu regulár 22 kuaze konklui ona hela de’it kapela ida iha suku Naimeko de’it mak seidauk finaliza maibé nia pagamentu ita konta finál ona, tanba hola ona materiál hodi kompleta konstrusaun, ne’ebé orsamentu aloka mai Oekusi, rihun $900-resin ita ezekuta ona ho nia pursentu 96%,” nia hateten.
Notísia relevante:PNDS Oekusi aprova projetu rua hodi implementa iha suku Monemeko no Kutete
Ezekutivu ne’e konsidera, ezekusaun fundu PNDS tinan ne’e iha Oekusi, hatudu progresu di’ak, kompara ho ezekusaun 2024, PNDS Oekusi tenki devolve fali fundu ba kofre Estadu rihun $200.
“Tinan ne’e orsamentu atu devolve fali ba Estadu valór uitoan de’it, paling rihun $2 ou rihun $3 hanesan ne’e, tanba projetu sira entrega ona, se ita kompara, ezekusaun tinan ne’e la’o di’ak kompara ho 2024, PDNS tenke devolve fali osan ba kofre Estadu hamutuk rihun $200 tanba impaktu projetu balun la konsege finaliza,” nia lembra.
Notísia relevante:PNDS Oé-Cusse sei devolve rihun $200 ba kofre Estadu
Jornalista: Abílio Elo Nini
Editór: Rafael Ximenes de A. Belo
