DILI, 09 Marsu 2026 (TATOLI)–Prezidente Liga Futeból Timor-Leste (LFTL), Ipolito Soares, hateten abertura ba Liga Futeból 2026 iha Timor-Leste, sei hala’o iha fulan-Abríl tinan 2026.
“Ami hala’o ona enkontru ho Ministru Juventude, Desportu, Arte no Kultura (MJDAK). Husi enkontru ne’e ita planu atu halo abertura ba jogu iha loron 10 fulan-Abríl,” Ipolito hateten ba Agência TATOLI liuhusi WhatsApp, segunda ne’e.
Lidér másimu LFTL ne’e dehan, kada tinan Liga la’o hetan apoiu orsamentu husi MJDAK no Federasaun Futeból Timor-Leste (FFTL), ho nune’e LFTL buka meiu hela atu hala’o enkontru ho FFTL oinsá bele apoiu tan orsamentu ba liga tinan ida-ne’e.
“Ita hotu hatene katak liga la’o hetan apoiu husi MJDAK no FFTL no ami mós buka tan fundu balu. Ami agora tenta hela atu enkontru ho FFTL iha semana ne’e, oinsa ko’alia kona-ba sira-nia apoiu ba liga ne’e,” nia dehan.
Nia hatutan, Governu iha ona kompromisu atu apoiu orsamentu ba liga tinan 2026 nian.
“Governu hanesan MJDAK sira prontu ona atu apoiu orsamentu mai LFTL. Montante hira, ami seidauk hatene maibé sira serteza ona atu apoiu orsamentu. Ohin, LFTL hatama ona oráriu jogu, planu orsamentu époka 2026 nian ba MJDAK,” nia hateten.
Daudaun ne’e, LFTL hala’o servisu másimu hela hodi prepara kondisaun hotu, nune’e bele realiza liga époka 2026 iha Dili.
MJDAK apoia osan $500.000 ba LFTL tinan 2025
Rekorda fali katak, Iha loron 16 fulan-Maiu, Orgaun ezekutivu LFTL hala’o reuniaun ho Prezidente klube Primeira no Segunda Divizaun iha sala reuniaun LFTL Dili, diskute no aprezenta planu orsamentu ba klube Primeira no Segunda Divizaun Liga Timorense epoka 2025.
Nune’e, Orgaun Liga Futeból Timor-Leste asina ona ASH ho Governu liu husi MJDAK ho totál $500.000 nebe’e transfere uluk 50%.
Orsamentu husi FFTL ate agora seidauk iha serteza nia laran, tanba ne’e Orgaun Liga Futeból Timor-Leste prepara no halo planu orsamentu bazeia ba orsamentu ne’ebé fixu, asina ona ASH, ho MJDAK.
Maske seidauk iha akordu ho FFTL maibé tuir karta husi FFTL ba LFTL katak bainhira Kick off FFTL sei manda uluk osan 35%, husi orsamentu $200.000 ne’ebé FFTL atu fó ba LFTL. Bainhira jogu primeira volta Remata mak foin amenta tan 15%.
Ba klube ne’ebé mak Kampiaun primeira divizaun Liga Timorense epoka ida-ne’e, sei hetan $25.000 diferensa ho antes ne’e $15.000, no prémiu ba kampiaun segunda divizaun sei hetan rihun $10.000.
Jornalista : Hortencio Sanchez
Editór : Cancio Ximenes
