BOBONARU, 10 Marsu 2026 (TATOLI)-Hahú husi Janeiru to’o 10 Marsu 2026, Ospitál Referénsia Maliana (HRM, sigla portugés) rejista kazu dengue hamutuk na’in-63 no husi númeru ne’e iha mate rua.
Diretór-Ezekutivu HRM, José Marçal da Cruz, hateten husi totál kazu ne’e, 52 labarik no 11 adultu. Daudaun ne’e pasiente na’in-haat mak sei internadu hela hodi hetan tratamentu medíku no rua transrefere bá Ospitál Nasionál Guido Valadares (HNGV), Dili.
“Husi totál pasiente ne’e, iha Fevereiru labarik ida mate no Marsu mós mate ida”, nia relata iha Maliana, ohin.
Notísia relevante: Ospitál Referénsia Maliana rejista pasiente ida mate ho dengue
Diretór salienta katak pasiente sira ne’e mai husi postu administrativu lima no barak liu husi Maliana Vila.
Moras Dengue Emorrájika hanesan moras ida-neʼebé kauza husi infesaun ho vírus dengue ne’ebé tranzmite liuhusi tata husi susuk Aedes Aegypti ka Aedes albopictus. Moras ida-ne’e dalabarak mosu iha área tropikál no subtropikál, inklui Timor-Leste.
Notísia relevante: Saúde Bobonaru apela ba inan-aman proteje labarik sira husi dengue
Jornalista: Sergio da Cruz
Editora: Maria Auxuliadora
