BOBONARU, 12 Marsu 2026 (TATOLI)-Iha enkontru avaliasaun kona-ba kondisaun mínima ba implementasaun podér lokál, komunidade Bobonaru rekomenda ba Governu atu aloka orsamentu hodi halo reabilitasaun estrada bá sítiu turístiku Bee-Manas Marobo ne’ebé foin lalais ne’e hetan danu kauza husi dezastre naturál.
Filomena Pires, rezidente Bobonaru dehan infraestrutura bazíka iha Bee-Manas Marobo hanesan uma, hariis-fatin, lampu no ekipamentu seluk kuaze aat totál.
“Ema estranjeiru atu bá vizita bee-manas, karreta tenke para kilómetru rua mak la’o bá. Dalan la di’ak, ida-ne’e mak ami husu Governu sentrál bele aloka orsamentu ida hodi hadi’a estrada Marobo”, nia hateten iha Zinájiu Maliana, ohin.
Ba kestaun ne’e, Primeiru-Ministru, Xanana Gusmão, hateten Governu haree ona kondisaun infraestrutura iha Bee-Manas Marobo no planu hela atu hadi’ak.
“Marobo foufoun ne’e haree kapa’as tebetebes. Marobo sei iha planu, Marobo labele sai hanesan ne’ebá, ita halo buat ruma di’ak ema husi li’ur mai bele bá iha ne’ebá”, Xanana dehan.
Bee-manas Marobo ne’ebé lokaliza iha foho llat-laun nia hún, iha munisípiu Bobonaro, hori uluk kedas rekoñese nu’udar fatin destinasaun turístika, nune’e Sekretaria Estadu Formasaun Profisionál no Empregu (SEFOPE) liuhusi Projetu Turizmu Komunitáriu reabilita no moderniza ona infrastrutura bázika husi ninia orijinalidade.
Bee-manas Marobo reabilita iha tempu Sekretáriu Estadu Formasaun, Profisionál no Empregu (SEFOPE), Ilídio da Costa Ximenes, iha 2015 ho totál kustu $498.860 no inaugura iha loron 08 Dezembru 2016 hosi Ministru Planeamentu no Investimentu Estratéjiku, Xanana Gusmão.
Notísia relevante: Governu seidauk prioriza reabilita Bee-Manas Marobo iha 2026
Jornalista: Sergio da Cruz
Editora: Maria Auxiliadora
