OEKUSI, 17 Marsu 2026 (TATOLI) – Sidadaun estranjeiru na’in-200 iha Rejiaun Administrativa Espesiál Oekusi Ambeno (RAEOA), partisipa iha ezame nasionalidade, organizadu hosi Ministériu Justisa (MJ) liuhusi Diresaun Nasionál Rejistu Notariadu.
Diretór Nasionál Rejistu Notariadu, Frederico Paulo de Fátima Martins, informa ezame ne’e fasilita husi ekipa Institutu Nasionál Linguístika (INL), ho kritéria atu pasa tenke hatene istória luta libertasaun nasionál, inu nasionál, kultura no tenke ko’alia lian ofisiál ida, tetun ka portugés.
“Ezame ne’e ita fó ba ekipa juri husi INL, mak fó ezame ho materia sira mak hanesan, sidadaun sira tenke hatene istória, kultura, ho lian ofisiál rua ne’e tetun no portugés, ezame ne’e espesiál ba RAEOA, tanba munisipíu sira seluk, konsentra iha Diresaun Nasionál Serbisu Notariadu,” nia hateten ba jornalista sira iha Oekusi, ohin.
Notisía relevante:Autoridade lokál Oésilo husu Governu hala’o ezame nasionalidade kada tinan
Diretór ne’e esplika, prosesu ezame ne’e, nia finalidade valór idak-idak mak determina, inklui dokumentu komprovativu sira atu pasa ka la’e, tanba sidadaun sira-ne’ebé kaben no hela iha Timor-Leste kle’ur ona, prienxe ona rekezitu liuhusi Lei númeru 9/2002, prevista iha Artigu 11, katak sira kaben iha Timor liu ona tinan-lima.
“Maibé tenke komprova ho dokumentu sertidaun kazamentu, balun hela tinan barak ona, sai ona katuas no ferik to’o agora seidauk hetan nasionalidade, tanba ne’e mak tinan-tinan ita mai fó ezame espesiál ba Oekusi,” nia hateten.
Notísia relevante:Governu presiza rezolve sertifikadu nasionálidade ba sidadaun estranjeiru iha TL
Diretór Rejionál Rejistu Notariadu no Terra Propriedade Oekusi, José Ase Neno Colo, esplika, tinan kotuk Ministériu Justisa (MJ) aprova ona diploma ministériál ida, hodi fó flexibilidade ba sidadaun ne’ebé kaben antes 1999, maske dokumentu la kompletu bele partisipa ezame, liliu Pasaporte.
“Imposível ita husu pasaporte ba sira, tanba barak mai iha tinan-1970 to’o 1980, entaun sira-nia nasaun orijen la rekoñese ona sira no difisil atu hasai pasaporte, tanba ne’e maka Governu liuhusi Ministériu Justisa fó flexibilidade katak, sira-ne’ebé kaben antes 1999, la presiza aprezenta pasaporte mós sira-bele tuir ezame, ne’e mak ohin ema mai barak,” nia hateten
Notísia relevante:MJ sertifika ema estranjeiru haat iha RAEOA sai sidadaun timor-oan
Ezekutivu ne’e informa katak kaléndariu atribuisaun sertifikadu nasionalidade ajenda ona iha loron Restaurasaun Independénsia 20 Maiu 2026.
“Seremónia atribuisaun sertidaun nasionalidade, ita planu iha loron Restaurasaun Independénsia 20 Maiu 2026. Ita sei atribui nasionalidade ba inan-aman sira-ne’ebé ohin tuir ona ezame no balun tinan-2025 ezame ona maibé seidauk hetan sertidaun nasiolidade,” nia afirma.
Notísia relevante:MJ Husu Labele Manipula Nasionalidade
Entretantu, ezame nasionalidade ne’e realiza durante loron tolu, hahú tersa ne’e sei termina iha loron-kinta 19 Marsu 2026, hodi fó oportunidade ba suku 20 mai husi sub-rejiaun Pássabe, Nítibe inklui Oésilo atu partisipa másima iha ezame ne’e.
Jornalista: Abílio Elo Nini
Editór: Rafael Ximenes de A. Belo
