OEKUSI, 26 Marsu 2026 (TATOLI) – Governu liuhusi Sekretáriu Estadu Protesaun Sívil (SEPS), kinta ne’e, oferese foos saka 1.500 ho nesesidade bázika ba Autoridade Rejiaun Administrativa Espesiál Oekusi Ambeno (RAEOA), hodi atende ba vítima dezastre naturál.
Sekretáriu Estadu Protesaun Sívil, Domingos Mariano Reis, informa, husi foos saka 1.500 ne’e fahe ba pakote rua, saka 1000 apoia ba kbiit-laek sira no saka 500 apoia ba vítima dezastre naturál.
“Ohin ita apoia pakote rua mai RAEOA, foos saka 1.500 purvolta tonelada 38, maibé estoke balun sei iha armazein APC Oekusi. Foos ida-ne’e pakote rua, pakote ida 1000 ba Autoridade RAEOA atu apoia ita-nia inan-aman sira-ne’ebé kbiit-laek, no saka 500 atu apoia ba emerjénsia sira kuandu akontese dezastre naturál ruma,” nia hateten ba jornalista sira iha Oekusi, ohin.
Membru Governu ne’e informa, pakotementu ne’e, la’ós foos de’it maibé kompleta kedas ho nesesidade bázika, ai-han no la’ós ai-han. Ai-han hanesan foos, supermie, masin-midar, kafé, susu-been no seluktan, la’ós ai-han mak hanesan lona, bikan sanán, tasu, buli, manta no seluktan.
“Supermie kaixa 250, non food kaixa 250, no nesesidade seluktan hanesan kafé, masin-midar saka 250 hotu,” nia hateten.
Governante reprezenta Governu Sentrál, hato’o solidariedade ba vítima dezastre naturál sira iha Oekusi, no agradese ba Autoridade RAEOA tanba liuhusi kooperasaun entre Autoridade Protesaun Sívil Oekusi, hodi fó halo intervensaun imediata ba vítima dezastre naturál sira-ne’ebé enfrenta iha tempu udan ne’e.
Notísia relevante:Udan boot loron tolu hamosu inundasaun, prejudika uma-kain 151 iha Pante Makasar
Reprezentante Prezidente Autoridade RAEOA, husi Xefe Gabinete Prezidente Autoridade, João Bano Suni, konsidera apoia ne’e pertinente tanba RAEOA presiza mós intervensaun husi Governu Sentrál, nune’e bele halo atendimentu rápida ba populasaun sira-ne’ebé sofre dezastre naturál iha Oekusi.
“Ita agradese ba Governu Sentrál, ne’ebé apoia ita, tanba jeografikamente ita dook, kuandu dezastre ruma akontese emerjénsia presiza halo intervensaun imediata, tanba ne’e maka apoia sira-ne’e ita apresia, tanba ne’e hakmaan ona ita, bainhira fó atendimentu ba vítima sira, tanba ita la serbisu mesak, maibé serbisu konjunta, autoridade koopera ho APC atu haree ba asuntu dezastre nian,”nia orgullu.
Notísia relevante:APC lansa sentru akollamentu ba resposta dezastre naturál iha Uma-Boot
Rekorde fali katak, iha loron fulan-Marsu ne’e, akontese udan boot, hamosu inundasaun iha Oekusi durante loron tolu, hahú 24 to’o 26 Marsu 2026 ne’e, hodi rezulta vítima 151, husi suku haat, Bobokase, Naimeko no suku Cunha, Lalisuk afeta inundasaun hodi estraga uma hela fatin, to’os inklui animál balun.
Entretantu, daudaun ne’e Autoridade Protesaun Sívil Oekusi rekolla ona dadus ba iha vítima sira-ne’ebé afeta inundasaun no hetan ona apoia emerjénsia.
Jornalista: Abílio Elo Nini
Editór: Rafael Ximenes de A. Belo
