DILI, 17 Abríl 2026 (TATOLI – Operasaun no vijilánsia UPM iha tasi kosta súl Uatukarbau, munisipiu Vikeke, kaptura tripulante 32 ho ikan tonelada sia tanba halo atividade peska ho dalan ilegál.
Liuhusi vídeo ne’ebé kapta husi Unidade Patrullamentu Marítimu (UPM) konsege kaptura ro peska ilegál husi Indonézia ho naran KM Makmur Rejeki Mulya, durante operasaun patrullamentu loron lima iha área tasi kosta sul, entre Beaço no Uatucarbau, iha tuku 18:00 OTL
Iha vídeo ne’ebé espalla, ró KM Makmur Rejeki Mulya, tenta halai sees husi vijilánsia UPM nian, maibé UPM ho espíritu lansa operasaun sériu no konsege asegura tripulante hirak-nee.
“Ita rabat kedas, rabat, sai hotu, sai hotu,” UPM nia instrusaun gravadu ho vídeo operasaun molok ekipa hakbesik ba ró peska ilegál ho naran ró KM Makmur Rejeki Mulya, sesta ne’e.
Operasaun patrullamentu ne’e realiza ho utilizasaun lancha rápida rua ho apoiu NRTL Lusitania, ho objetivu atu reforça fiskalizasaun no proteje rekursu marítimu Timor-Leste nian.
Durante operasaun, ekipa UPM deteta no kaptura ro refere ne’ebé hala’o atividade peska ilegál iha área tasi Timor. Iha ró laran, autoridade sira identifika tripulante hamutuk ema nain 32.
Aleinde ne’e, UPM konfiska ikan ho totál aprosimadamente tonelada sia-resin, rede arastu no ekipamentu seluk ne’ebé utiliza ba atividade peska ilegal.
Hafoin kaptura, sidadaun sira no evidénsia hotu entrega ona ba Komandu Munisípiu Lautém hodi kontinua prosesu investigasaun no asaun legál tuir lei ne’ebé vigora.
Ro refere agora hela iha Porto Com, Munisípiu Lautém, no sei submete ba prosedimentu legál.
Autoridade sira reafirma katak operasaun hanesan ne’e sei kontinua atu asegura protesaun ba rekursu naturál no soberania marítima Timor-Leste.
Notísia relevante: 2024-2026, Timor-Leste lakon millaun $48-resin tanba atividade peska ilegál
TATOLI
