BOBONARU, 28 Abríl 2026 (TATOLI) – Komunidade no líder komunitáriu sira husu ba Governu tau prioridade ba reabilitasaun estrada rurál husi aldeia Maganutu, suku Ritabou, postu administrativu Maliana, bá aldeia Raifun-Foho, hodi fasilita movimentasaun ema nian.
“Ami-nia estrada ne’e tinan barak ona Estadu seidauk tau-matan. Kuandu udan ona ami susar la halimar. Durante ne’e ami hadi’ak de’it ho liman, más udan mai aat filafali”, rezidente António de Jesus dehan iha minimerkadu Ilibole.
Iha sorin seluk, Xefe Suku Raifun, Domingos Salvador, konfirma katak estrada ne’e hetan ona aprovasaun liuhusi Asembleia Postu Administrativu (ASPA) Maliana no diskute ona iha Konsellu Koordenasaun Munisipál hodi prioriza iha Planu Dezenvolvimentu Integradu Munisipál (PDIM) 2027.
Domingos Salvador subliña katak Governu presiza konsidera no tau prioridade hodi rezolve tanba estrada ne’e importante, ne’ebé entre suku Raifun no Ritabou no durante ne’e sai dalan boot ba estudante sira husi aldeia Raifun-Foho atu asesu tuir prosesu ensinu no aprendizajen iha Ensinu Báziku Sentrál Nunutanan no komunidade sira atu bá konsulta iha Postu Saúde Nunutanan.
“Kuandu tempu udan inan-aman sira husi Raifun-Foho atu bá konsulta mós susar, labarik sira mós susar kuandu udan mota-tun pasiénsia sira tenke fila. Tanba ne’e ami husu atu konsidera proposta ne’e”, nia hato’o.
Diretór Servisu Munisipál Obra Públika, Autoridade Munisípiu Bobonaru, Marcelino Godinho, konfirma estrada ne’e tama ona planu prioridade husi Ministeriu Obra Públika (MOP) tinan 2027. “Tama ona sistema husi Nunutana bá iha Raifun-Foho liga liu bá iha Ilibole”, nia dehan
Tuir dadus, estrada ne’e ho distánsia kilómetru hitu-resin ne’ebé sei benefisia be ema na’in-3.000- resin husi aldeia Maganutu no Raifun-Foho.
Notísia relevante: Abitante aldeia Raifun foho sei toba iha nakukun
Jornalista: Sergio da Cruz
Editora: Maria Auxiliadora
