OEKUSI, 29 Abríl 2026 (TATOLI) – Família husi matebian jornalista seniór Timor-Leste, Costancio Ote, husu deskulpa ba jornalista sira iha Timor-Leste, ba matebian nia komportamentu durante hamutuk iha mundu jornalizmu.
Nia hateten, matebian durante nia peregrinasaun iha mundu, konsege funda mídia Jornál Timor Post. Iha família matebian nu’udar oan daneen husi família maun-alin na’in-hitu, feto rua no mane na’in-lima.
Nu’udar alin husi matebian, konta katak, matebian sofre moras iha loron 11 Marsu 2026 iha Ospitál Referál Oekusi no hakotu iis iha loron kuarta 28 Abríl 2026 iha oras tuku 03:35 madrugada.
“Ha’u-nia alin ne’e dedika nia an iha mundu jornalizmu dezde tempu okupasaun to’o iha ukun rasik-an. Tanba ne’e, karik durante ne’e nia hahalok ladun di’ak, ami nu’udar família husu deskulpa ba públiku, liliu jornalista sira hotu iha Timor-Leste,” nia ko’alia ho mataben iha Oekusi, ohin.
“Ami rona no akompaña nia hanesan mestre tanba fahe ona nia matenek iha alin sira barak tantu husi nasionál to’o munisipíu, ne’ebé ho haraik an husu deskulpa ba nia hahalok, husu ajuda ba nia kolega jornalista akompaña nia ho orasaun, nune’e nia bele hetan isin di’ak iha mundu seluk,” nia
Notísia relevante:Jornalista sénior Timor-Leste, Otélio Ote, hakotu ona iis
Costancio Ote, konfirma, Matebian Otélio Ote, nu’udar kaben-na’in, iha oan na’in-neen. Durante matebian moris, subar nia moras, bainhira moras to’o iha ospitál, husi doutor sira, relata katak, matebian moras komplikadu boot maibé konsege rekuperadu nia hipertensaun, maibé moras seluk la konsege kura tanba domina liu ona isin-lolon. Moras ne’ebé to’o nia iis kotu, tanba me’ar tasak mak domina iha paru-paru (pulmaun) entaun susar tebes atu dada iis ho normál.
Tanba ne’e, hafoin matebian hakotu iis, família deside sei transporta ba nia rezidénsia iha Dili tanba nia oan sira inklui família balun iha Dili.
“Tanba família balun iha Dili. Nia uma no nia oan sira mós iha Dili, tan ne’e família husi Oekusi foti desizaun horikalan maktoban sei hamutuk ho família, nia feton no maun sira iha Oekusi, no ohin dadersan mak foin atu transporta ba Dili, ne’e mak ami hein hela aviaun, no seremónia funebre mós sei hakoi iha Dili,” nia hateten.
Notísia relevante:Otélio Ote kompromete hametin kooperasaun-promove liberdade imprensa no espresaun
Jornalista: Abílio Elo Nini
Editór: Rafael Ximenes de A. Belo
