DILI, 08 Maiu 2026 (TATOLI)—Populasaun no Uniaun Estudantil Laklubar (UEL), hosi Postu Administrativu Laklubar, Munisípiu Manatutu, protesta desizaun husi Diresaun Nasionál Transporte Terrestre (DNTT) no Diresaun Transporte Munisipál no Komunikasaun (DTMC-sigla portugeza) ne’ebé limita operasaun transporte públiku husi Laklubar ba Dili.
Portavóz UEL, Jerónimo Soares, konsidera medida ne’e hanesan fali polítika diskriminatória no la fó asesu ne’ebé justu ba komunidade, liuliu ba estudante sira-ne’ebé presiza halo movimentasaun iha tempu matríkula nian.
“Uniaun Estudantil Laklubar-oan kondena ho lian maka’as ba desizaun husi DNTT no autoridade Munisípiu Manatutu ne’ebé limita no impede transporte husi Laklubar mai Dili. Enkuantu, sira kontinua fó autorizasaun ba direasaun seluk hanesan Natarbora no Lakló atu opera normalmente,” nia dehan ba jornalista sira iha Jardín 05 de Maiu, Sesta ne’e.
Estudante ne’e afirma Timor-Leste nu’udár Estadu Direitu Demokrátiku iha obrigasaun konstitusionál atu garante igualdade ba sidadaun hotu-hotu hodi asesu ba servisu públiku, inklui transporte ne’ebé livre husi diskriminasaun.
Nune’e, estudante Simão Gonzaga hatutan durante fulan tolu ikus-ne’e, polítika ne’e obriga operadór transporte sira husi Laklubar atu para sira-nia operasaun. Situasaun ne’e hamosu difikuldade boot ba povu no estudante sira-ne’ebé presiza transporte hodi trata kestaun akadémika no nesesidade loron-loron nian.
“Medida ida-ne’e la’ós de’it la justu, maibé mosu diskriminasaun ne’ebé klaru no sistemátiku husi DNTT no DMTC. Aleinde ne’e, Uniaun Estudantil ne’e akuza katak tratamentu ne’ebé autoridade sira hatudu nu’udár evidénsia katak iha violasaun ba prinsípiu universál no igualdade ne’ebé prevee iha Artigu 16 Konstituisaun Repúblika Demokrátika Timor-Leste (RDTL),” nia deklara.
UEL deklara katak lei labele uza hanesan arma hodi hanehan grupu balun, maibé tenke sai hanesan instrumentu justisa nian ne’ebé proteje sidadaun hotu nia direitu.
Jornalista: Osória Marques
Editór: Xisto Freitas da Piedade
