OEKUSI, 20 Maiu 2026 (TATOLI) – Adjuntu Bupati Timur Tengah Utara (TTU), Kamilus Elu, reprezenta Governu Indonézia liliu propínsia Nusa Tenggara Timur (NTT), kuarta ne’e, partisipa iha komemorasaun loron Restaurasaun Independénsia 20 Maiu ba dala-24 iha Rejiaun Administrativa Espesiál Oekusi Ambenu (RAEOA).
“Ha’u mai reprezenta Governu Propínsia NTT no povu NTT nia naran hato’o feliz aniversáriu ba nasaun viziña Timor-Leste nia independénsia ba dala-24, ne’ebé kontinua la’o ba oin ho dame. Governu NTT espesiálmente TTU tanba fronteira direita, sei servisu hamutuk nafatin ho ita-nia maun-alin sira iha illa Timor. Ita tenke forte hodi harii illa Timor liuhosi relasaun di’ak, liuliu tradisaun kulturál sira hodi realiza ita-nia bein-estar, tantu iha Timor-Leste, no mós iha Indonézia liuliu NTT, parabéns, parabéns Timor-Leste,” Adjuntu Bupati TTU, Kamilus Elu kongratula, iha komemorasaun loron Restaurasaun Independénsia 20 Maiu , hala’o iha kampu Um de Maio Palaban, ohin.
Notísia relevante:Vise Governadór NTT husu komunidade iha fronteira TL no Indonézia promove dame
Iha biban ne’e, Prezidente Autoridade RAEOA, Régio da Cruz Salu, agradese tanba ho prezensa husi Governu NTT bele haforsa liutan liña kooperasaun iha liña fronteira.
“Iha momentu importante ida-ne’e, ami hato’o ami-nia agradesimentu kle’an hodi komunidade Oekusi Ambeno, Timor-Leste nia naran, ba Governu Provínsia Nusa Tenggara Timur (NTT), liliu maluk sira TTU, TTS no Kupang, ba sira-nia fuan nakloke, odamatan, matenek, konxiénsia, solidariedade, hodi akompaña tempu tomak ne’e no proteje Oekusi Ambeno ho nia arredór sira, iha liña fronteira iha territóriu Oekusi,” nia hateten iha diskursu ofisiál ne’e.
“Ohin, iha aniversáriu Restaurasaun Independénsia Repúblika Demokrátika Timor-Leste ba dala-24, prezente iha ita-nia leet, iha ita-nia fuan no klamar, Sua Exelénsia Adjuntu Bupati TTU, Drs. Kamilus Elu, SH, buat hothotu la’ós tuir de’it selebrasaun ida, maibé tanba ita nu’udar maun-alin husar-talin ida de’it, ho lian baiqueno katak, ‘AU TEIFA TUKAN KIT, NAK A HO SIKAU, AU MSAT SIKAU, KALU KABUK AU TEIFA TUK ΝΑ ΚΟ,” nia hateten.
Notísia relevante:RAEOA sei hasa’e koñesimentu xefe suku liuhosi estudu komparativu iha NTT
Jornalista: Abílio Elo Nini
Editór: Rafael Ximenes de A. Belo
