Kovalima,01 Juñu 2026 (TATOLI)-Komunidade sira iha suku Fatumea, postu administrativa Fatumea munisípiu Kovalima, segunda ne’e, organiza malu hodi hadi’a estrada ne’ebé liga husi suku Fatumea bá postu administrativu hodi fasilita movimentu komunidade nian hodi asesu merkadória.
Xefe suku Fatumea, postu administrativu Fatumea, munisípiu Kovalima, Sergio do Rego hateten atividade servisu hamutuk ka gotong royong ne’e realiza tanba hetan koordenasaun di’ak ho xefe aldeia no komunidade iha aldeia Fatumea no Mota-ulun.
“Komunidade ke’e estrada ba daruak ona hodi fasilita komunidade sira halo movimentu ho transporte públiku no privada,” nia realata ba TATOLI, ohin.
Nia dehan desizaun hodi organiza komunidade sira kee rasik estrada ne’e tanba atu fasilita movimentu sidadaun sira no mós transporte públiku no privada husi suku bá postu hodi sosa sasán nesesidades bázika. Husi suku atu bá postu administrativu komunidade sira tenke la’o ain ho distánsia killómetru 6-resin.
“Molok organiza Komunidade ha’u submete ona karta ba administradór postu administrativu no kontinua submete ba iha IGE no Servisu Munisipál obra públiku maibé laiha rezultadu, tanba ne’e, ha’u rasik organiza komunidade no funsionáriu sira, ami ke’e rasik estrada,”nia dehan.
Tuir nia, komunidade susar atu asesu merkadu tanba kondisaun estrada aat difikulta movimentu transporte husi diresaun postu bá suku nune’e mós husi suku bá postu to’o nasionál. Ho problema ne’e maka ohin organiza komunidade sira hodi kee rasik dalan públiku iha suku referidu.
Tuir dadus totál populasaun iha suku Fatumea postu administrativu Fatumea hamutuk 1.108 husi númeru ne’e mane 571 no feto 537.
Iha fatin hanesan komunidade, João Cardoso de Lima, husu ba Governu liuhosi MOP atu tau iha planu hodi kontrui estrada ne’e ba futuru.
“Ukun-nain sira presiza tau netik matan mai ami tanba ami hadi’a estrada uza de’it ami-nia forsa, tanba bainhira estrada ladiak difikulta ami atu halo movimentu uza transporte públiku no privadu tanba kondisaun estrada grave tebes, ” nia hateten.
Hatan ba pedidu ne’e, Diretór Servisu Munisipál Obra Públika, Sidonio Gusmão, rekoñese, antes ne’e simu duni karta husi xefe suku Fatumea kona-bá normalizasaun estrada iha suku ne’e.
“Xefe Suku Fatumea Submete duni mai iha Prezidente Autoridade Kovalima no Obra Públika simu despaixu husi PAM kestaun balun mak prejudika ami atu apoiu hodi normaliza estrada tanba ekipamentu pezada la’os foku normaliza estrada iha Kovalima de’it maibé iha mós fatin sira seluk nune’e ita seidauk bele responde,”nia klarifika.
Jornalista: Celestina Teles
Editor: Florencio Miranda Ximenes
