DILI, 02 Juñu 2026 (TATOLI)—Treinadór FIEL FC, Hermelio José Pereira Ximenes da Conceição, hateten ekipa FIEL prontu enfrenta jogu kontra Nagardjo FC iha jogu aban kalan iha Estádiu Munisipál Dili, segunda divizaun époka 2026.
Treinadór ne’e fiar katak sei hatudu jogu di’ak hodi manán nia adversariu hodi hadau pontu tolu.
”Ekipa Nagardjo FC ita hotu-hotu hatene katak ekipa ne’ebé boot iha Segunda Divizaun, no nia mai ho materi jogadór ne’ebé di’ak, iha estranjéiru mós iha. Ami nu’udar ekipa FIEL, ami preparadu hodi kontra Nagardjo aban kalan,” Treinadór FIEL ne’e hateten liuhusi konferénsia imprensa iha Estádiu Munisipál Dili, tersa ne’e.
Maske iha jogu segunda divizaun ne’e rasik ekipa sira atu halo preparasaun di’ak-liu defisíl tanba kestaun deskansa loron tolu husi jogu ne’ebé hala’o ona, maibé ekipa FIEL FC preparadu ona hodi kompete iha loron Kuarta semana ne’e.
”Kona-ba preparasaun, ita hotu-hotu hatene katak iha jogu segundu divizaun ne’e, ita atu halo preparasaun ba di’ak liu ne’e labele tanba deskansa lalais de’it, deskansa loron tolu de’it. Maibé ha’u nu’udar treinadór lidera ekipa FIEL, ha’u tenke buka manéira oinsá para halo preparasaun, no agora daudaun ami-nia preparasaun di’ak hodi kontra Nagardjo,” nia dehan.
Nia subliña katak, kontinua buka estratéjia di’ak hodi nune’e bele hatudu tátika ne’ebé furak no lori vitória ba ekipa.
“Kona-ba fiar an, ekipa hotu-hotu fia an, tanba jogu ne’e foin mak iha klaran, seidauk hetan nia rezultadu finál. Hanesan ohin Nagardjo dehan nia fiar an bele hetan pontu tolu, ha’u responde ami mós agora daudauk prontu no preparadu. Ha’u sente jogu iha loron aban ne’e sei furak no ami sei halo jogu ne’ebé furak kontra Nagardjo,” nia dehan.
Iha biban ne’e, kona-ba mehi atu sa’e ba Primeira Divizaun, treinadór ne’e akresenta katak klube hotu-hotu ne’ebé kompete iha Segunda Divizaun iha mehi ne’ebé hanesan, maibé buat hotu depende ba servisu maka’as iha kampu laran.
Iha fatin hanesan, treinadór Nagardjo Nataniel Reis, hateten nia ekipa mós preparadu atu kontra FIEL FC.
“Ami preparadu atu kontra sira. Ami mós iha matéria jogu, oinsá ami bele manán sira. Buat hotu minutu 90 iha kampu mak sei termina,’ Nataniel dehan.
Kona-ba fallansu sira iha jogu antes ne’e, nia hateten, tenta hadi’a ona no preparadu atu kompete.
Nia mós rekoñese FIEL la’ós ekipa kiik, maibé ekipa ne’ebé forte no manán ona jogu rua iha jogu antes ne’e.
Iha tabela klasifikasaun provijoriu grupu A ne’e FIEL mak lidera provizóriu ho pontu neen (6), AD Santo António iha okupa pozisaun daruak ho pontu tolu (3), Nagardjo pozisaun datoluk ho pontu ida (1), Pozisaun dahaat Ponta Leste ho pontu ida (1) ikus liu okpua husi Vila Atauru ho pontu zero.
Jornalista : Hortêncio Sanchez
Editór : Cancio Ximenes
