DILI, 02 Juñu 2026 (TATOLI) — Governu Tailándia oferese apoiu finanseiru dahuluk ho montante US$3.100 ba Casa Vida atu ajuda organizasaun ne’e kontinua nia esforsu hodi prevene no responde ba kazu violénsia bazeia ba jéneru (VBJ) hasoru feto no foin-sa’e sira iha Timor-Leste.
Entrega apoiu ne’e realiza ohin (02/06), hosi Embaixadór Tailándia ba Timor-Leste, Atipat Rojanapaibulya, nu’udar parte husi kooperasaun entre Governu Tailándia no Casa Vida atu hametin seguransa humanu no promove direitu feto no labarik sira.
Iha okaziaun ne’e, Embaixadór Atipat reafirma Tailándia nia kompromisu atu apoia Timor-Leste liuhosi programa sira ne’ebé fó prioridade ba empoderamentu feto, protesaun labarik, saúde públika, edukasaun no dezenvolvimentu ekonomiku.
Diretora Ezekutiva Casa Vida, Alzira Pereira, hato’o agradese ba Embaixada Tailándia tanba nia apoiu ba fundasaun ne’e. Tuir nia hateten, kontribuisaun ne’e sei ajuda Casa Vida kontinua fornese servisu essensiál ba vítima sira.
Embaixada Tailándia no Casa Vida kolabora ona durante tinan hirak liubá. Atividade sira ne’e inklui Jantar Gastronómiku Tailándia ne’ebé realiza iha Aroma Café iha 23 Marsu 2025, no mós doasaun regulár ba ekipamentu no nesesidade bázika sira.
Casa Vida prevee atu uza fundu ne’e hodi finansia alojamentu temporáriu, fornesimentu ai-han no programa formasaun vokasionál ba feto no foin-sa’e Timoroan sira ne’ebé sai vítima husi violénsia bazeia ba jéneru.
Kolaborasaun entre Tailándia no Casa Vida reflete kompromisu komún atu hadi’a bem-estar, dignidade no oportunidade ba feto no labarik sira, partikularmente sira ne’ebé vulnerável ba violénsia no diskriminasaun.
Jornalista: Camilio de Sousa
Editor: Filomeno Martins
