OEKUSI, 05 Juñu 2026 (TATOLI) – Ministru Obra Públika (MOP), Samuel Marçal, atuál Prezidente Konsellu Administrasaun Fundu Espesiál Dezenvolvimentu (KAFED), sesta ohin, fó ona orientasaun rua ba Rejiaun Administrativa Espesiál Oekusi Ambeno (RAEOA), atu aselera ezekusaun Orsamentu Jerál Estadu (OJE) 2026 no prepara ona Planu Asaun Anuál (PAA) ba OJE 2027 nian.
“Ohin, ami mai ho ekipa ida, atu enkontru ho estrutura RAEOA, liliu Diretór Finansa, Planeiamentu no Diretór Aprovizionamentu, ho objetivu rua; ida, diskute oinsá aselera ezekusaun ba orsamentu RAEOA nian, ida seluk atu prepara ona Planu Asaun Anuál (PAA) ba orsamentu 2027 nian,” Samuel Marçal hato’o ba jornalista, hafoin reuniaun ho Prezidente Autoridade RAEOA ho estrutura tomak, iha salaun Gabinete Oekusi, sesta, ohin.
Notísia relevante:MAE rekomenda RAEOA prepara proposta Orsamentu Retifikativu 2026 no PAA 2027
Nia esplika, orientasaun ne’e, autoridade tenke sériu atu konsidera, tanba ne’e hahú ohin ba oin, halo diskusaun ho kargu xefia sira, hodi diskute kona-ba planu prioridade sira ba setór hothotu atu integra iha planu Orsamentu Jerál Estadu 2027 nian.
Governante ne’e fó hanoin katak polítika atu hasa’e ezekusaun maka tenke haree fali obstaklu antes ne’e sai dezafíu ba ezekusaun la sa’e, razaun ida tanba mudansa iha sistema orsamentu relasaun ho mudansa estrutura tranzitória ba definitivu no daudaun ne’e mós Governu instala ona Sekretáriadu FED asesu ba sistema orsamentu hodi jere didi’ak Fundu Espesiál Dezenvolvimentu (FED) RAEOA atu hahú halo ona pagamentu ba projetu sira.
“Ohin, ha’u mai ko’alia hela ho Prezidente Autoridade, atu dudu tékniku sira atu aselera ezekusaun tuir progresu sira-ne’ebé iha terrenu, la’ós de’it ezekusaun maibé atu ajuda aselera kapitál dezenvolvimentu, tanba orsamentu bo’otliu iha ne’e no kapitál umanu, nune’e bele aselera projetu sira bele la’o, no ha’u husu Prezidente atu halo reuniaun ho setór privadu sira hotu, liliu sira-ne’ebé kaer hela projetu, atu aselera obra sira, atu ita-bele halo pagamentu hodi hasa’e ezekusaun Oekusi nian,” nia hateten.
Tuir nia, bainhira ezekusaun orsamentu RAEOA nian sa’e, maka iha direitu ba tinan-2027 atu husu tan osan ho razaun forte, tanba Governu atu aloka osan ba kada munisípiu ba tinan ida nian, depende ba persentajen ezekusaun idak-idak.
Notísia relevante:Governu instala sekretariadu jere fundu espesiál dezenvolvimentu iha RAEOA
Iha biban ne’e, Diretora Serbisu Rejionál Finansa Oekusi, Adelaide Rosália Faria, rekoñese ezekusaun RAEOA foin atinje de’it 10% no Fundu Espesiál Dezenvolvimentu (FED) foin mak atinje de’it 2%.
“Ami rekoñese, foin daudaun ami aprezenta iha nasionál, ema hotu preokupa kona-ba ezekusaun RAEOA nian tanba foin atinje 10% no FED nian foin mak atinje 2%. Ami konsiente ida-ne’e, hanesan Oekusi-oan sente moe uitoan tanba aprezenta iha ema barak nia oin, maibé preokupasaun ne’e la’ós tanba ami la serbisu maibé tanba mudansa estrutura mak afeta ba ezekusaun. Maibé, ami promete hafoin ami simu pose, garante sei hasa’e ezekusaun,” nia kompromete.
Notísia relevante:PA interinu RAEOA garante sei halo jestaun di’ak ba ezekusaun OJE 2026
Hatan ba orientasaun rua ne’e, Prezidente Autoridade RAEOA, Régio da Cruz Salu, kompromete esforsa atu kumpre, tanba atu bainhira atu propoin tan orsamentu ba tinan ida tenke konfirma ho ezekusaun.
“Ita-nia ezekusaun la sa’e tanba pedidu aprovasaun ba despeza, aprova dezde fulan-Janeiru to’o Fevereiru 2026, Marsu sistema foin loke, tama-fulan Abríl estrutura tuan sesa, no estrutura foun tama fali iha Maiu 2026 ne’e, hafoin estrutura foun tama, repedidu barak komesa tama ba Autoridade RAEOA, balun repedidu dalarua, ha’u dehan ne’e últimu aprovasaun repedidu ba pagamentu, ida ne’e maka atraza, maibé ita esforsa ba tinan ita bele husu osan Governu bele fó tan,” nia hateten.
Maibé, nia dehan, husi Diresaun Serbisu Rejionál Finansa konfirma katak, posibilidade iha fulan-Juñu 2026 ne’e, ezekusaun RAEOA sei sa’e to’o 27%, presiza atualiza tanba foin daudaun iha Ministériu Finansa, ezekusaun RAEOA foin maka atinje 10% inklui kompromisu no obrigasaun no ezekusaun despeza.
Kona-ba Planu Asaun Anuál 2027, daudaun kargu xefia sira hahú diskute ona, tanba tenke prepara ona, nune’e labele atraza tan, maibé klarifika katak agora tama ona trimestre daruak RAEOA tenke esforsa ba ezekusaun, kompara iha tinan kotuk 2025 to’o Dezembru ezekusaun konsege atinje 80% liu.
Notísia relevante:Governu apoia metodolojia foun ba preparasaun OJE 2027
Jornalista: Abílio Elo Nini
Editór: Rafael Ximenes de A. Belo
