BOBONARU, 25 Juñu 2026 (TATOLI) – Diresaun Nasionál Seguransa Rodoviária (DNSR) no Diresaun Nasionál Transporte Terrestre (DNTT) realiza atividade sensibilizasaun kona-ba seguransa rodoviária ba estudante sira iha Eskola Sekundária Jerál Públika (ESG) Númeru 1 Don Martinho da Costa Lopes, Maliana, munisípiu Bobonaru.
Atividade ho tema “Seguransa iha ita-nia liman rasik, konxiénsia, pasiénsia no seguru atu proteze vida umana”, ne’e ho objetivu mak atu hamenus risku asidente rodoviária no hasa’e koñesimentu estudante sira kona-ba utilizasaun via públika ho seguru.
Diretór Nasionál Seguransa Rodoviária, Helder Soares, hatete katak DNSR realiza atividade ne’e tanba Ministériu Interiór iha responsabilidade morál atu proteje vida no futuru jerasaun foun sira.
Notísia relevante: PNTL Bobonaru rejista asidente tráfegu 42 inklui na’in-tolu lakon vida
“Ami hadomi tebetebes alin no oan sira-nia futuru. Tanba ne’e mak ami mai atu fahe informasaun kona-ba seguransa rodoviária. Ita-boot sira mak jerasaun kontinuadór ba rai ida-ne’e no bele sai porta-vós atu hatutan mensajen ida-ne’e ba kolega sira seluk”, Helder Soares dehan.
Komandante Munisípiu Polísia Bobonaru, Superintendente Xefe Damião da Silva Correia, fó hanoin ba alunu sira katak ema hotu ne’ebé hakarak kondús karreta ka motorizada tenke iha karta kondusaun no kumpre lei no regulamentu estrada nian.
“Agora ita haree labarik idade 12 to’o 15 lori motór, maski seidauk iha direitu atu kondús. Situasaun ida-ne’e kontribui ba númeru asidente ne’ebé aas, tanba sira seidauk iha koñesimentu sufisiente kona-ba regra tránzitu”, Damião hateten.
Nia mós husu utilizadór estrada sira atu kondús ho pasiénsia no responsabilidade, tanba halai ho velosidade aas no la respeita regra estrada bele lori ba ema ba rai-ku’ak ka lakon vida.
“Vida la fa’an iha loja Kolmera, bainhira lakon ona, buka la hetan, inan-aman sira lakon, terus tanba imi-nia atitude, nakar-teen. Di’ak liu kumpre tanba agora ema hotu halai iha Vila laran, pasiénsia laiha, gás mohu, ida-ne’e estraga ita-nia vida no ema seluk nia”, nia dehan.
Diretór Eskola Sekundária Jerál Públika Númeru 1 Don Martinho da Costa Lopes, Juvenal dos Reis Ferreira, apresia inisiativa Governu nian ne’ebé konsidera importante atu hasa’e konxiénsia estudante sira kona-ba seguransa rodoviária.
Nia informa katak eskola ne’e iha alunu hamutuk 1.300-resin, no besik estudante 100 mak partisipa diretamente iha atividade sensibilizasaun ne’e depois bele fahe tutan informasaun ba estudante sira seluk.
“Ba oan sira, ida-ne’e oportunidade importante atu akompaña. Dalaruma ita-boot sira lori motorizada la tuir regra, tanba ne’e preiza tau atensaun nune’e bele proteje ita-nia vida, tanba asidente akontese iha Maliana kuaze loroloron, dalaruma ita rasik xoke ema, ema xoke ita ne’e tanba dalaruma ita rasik seidauk hatene regra”, katak.
Atividade sensibilizasaun ne’e foka ba utilizasaun karreta no motorizada tuir lei, sinál tránzitu no prinsípiu seguransa rodoviária atu kontribui ba redusaun númeru asidente iha Bobonaru.
Tuir dadus husi Seksaun Tránzitu Seguransa Rodovária, Komandu Munisípiu Polísia Bobonaru, husi fulan-Janeiru to’o Maiu ne’e rejista asidente tráfegu hamutuk 42, inklui na’in-tolu lakon vida no kazu sira ne’e akontese maioriza tanba fatór umanu.
Notísia relevante: DNTT Bobonaru no PNTL husu komunidade aumenta disiplina iha estrada hodi redús asidente
Jornalista: Sergio da Cruz
Editora: Maria Auxiliadora
