HNGV klarifika laiha problema ba oksijéniu
DILI, 18 Agostu 2026 (TATOLI)—Diretór Servisu Apoiu Diagnóstiku no Terapéutiku HNGV, Vidal de Jesus Lopes, klarifika Hospital Nasional Guido Valadares laiha problema ba oksijéniu tanba Hospitál rasik prodús oksijéniu hodi fornese ba enfermaria sira.
“Atu klarifika ba publiku katak HNGV laiha problema ba oksijeniu tanba HNGV rasik bele prodús oksijéniu iha ne’e. Uluk mak ita depedensia ba INFPM, maibe agora HNGV prodús rasik no distribui rasik ba sala enfermaria sira, ” Vidal Lopes dehan iha nia kna’ar fatin HNGV, ohin.
Nia relata kada loron produz okjijeniu hamutuk 174 silindru ate 200 iha Hospital Nasionál Guido Valadares.
Antes ne’e Organizasaun Mundiál Saúde (OMS) iha Timor-Leste halo Handover oksijéniu ba Hospitál Nasionál Guido Valadares no aumezmu tempu fó formasaun kona-ba oinsá operasaun sentrál oksijéniu nian ba tékniku HNGV hamutuk na’in-30-resin.
“Governu Timor-Leste determinadu atu rezolve lakuna ida-ne’e no asegura katak sidadaun timoroan ida-idak iha asesu ba oksijéniu ho kualidade aas bainhira sira presiza,” Reprezentante OMS iha Timor-Leste, Arvind Mathur, hateten ba jornalista sira iha HNGV, Bidau, ohin.
Nia hateten, fábrika Oksijéniu ida-ne’e, Timor-Leste hatudu ninia abilidade iha inisiativa fabrikasaun lokál ba produtu médiku sira realizasaun istóriku ida-ne’ebé signifikativu tebes ne’ebé anunsia dalan ba buat barak tan ne’ebé sei mai.
“Iha loron rua tuir mai, ami sei hala’o formasaun prátika no teórika intensivu kona-ba operasaun sentrál oksijéniu nian, enkomenda, manutensaun no rezolusaun ba problema sira. Programa ida-ne’e dezeña atu ekipa HNGV ho matenek tékniku no konfiansa ne’ebé presiza atu asegura jestaun seguru, efisiente no sustentável ba servisu oksijéniu nian ne’ebé asegura ho kualidade,” nia hateten.
Tuir nia, formasaun ne’e ekipa HNGV sei bele identifika indivídu sira-ne’ebé iha kapasidade liu atu sai hanesan pontu fokál ba sentrál oksijéniu, hodi garante responsabilizasaun, kontinuidade, no exelénsia iha ninia operasaun.
Jornalista : Felicidade Ximenes
Editór : Cancio Ximenes
