MJDAK-PAM-órgaun desportiva 13 realiza reuniaun koordenasaun kona-ba FND 2026

DILI, 18 Agostu 2026 (TATOLI)—Ministériu Juventude, Desportu, Arte no Kultura (MJDAK) hamutuk ho Prezidente Autoridade Munisípiu (PAM) husi munisípiu 13, Konfederasaun Desportu Timor-Leste (CDTL) no Komité Paralímpiku Nasionál Timor-Leste (CPNTL) realiza enkontru koordenasaun ba Festival Nasionál Desportu (FND) 2026 iha Salaun Magna MJDAK Lesidere, tersa ne’e.

Enkontru traballu ne’e lidera husi Ministru Juventude, Desportu, Arte no Kultura, Nelyo Isaac Sarmento ne’e, ho objetivu atu diskute no finaliza matadalan ba realizasaun FND no Festivál Desportu Paralímpiku (FDP).

Ministru Nelyo hateten, objetivu enkontru ne’e atu konsolida hanoin, aliña vizaun téknika no estabelese matadalan klaru hodi garante eventu ne’e la’o ho susesu iha nível munisipál no nasionál.

“Objetivu prinsipál mak atu garante katak Festivál Nasionál Desportu no Festivál Desportu Paralímpiku ne’e bele la’o ho di’ak no inkluzivu ba timoroan hotu,” Ministru Nelyo hateten durante enkontru.

Iha enkontru ne’e parte hotu diskute kona-ba asuntu importante haat mak hanesan: dahuluk, Estrutura no regulamentu. Parte sira formula ona matadalan tékniku ba modalidade desportiva sira-ne’ebé sei kompete iha FND no FDP.

Daruak, Inkluzaun ba Atleta Paralímpiku ne’e CPNTL enfatiza importánsia husi fasilidade no biban ne’ebé hanesan ba atleta ho nesesidade espesiál sira atu partisipa ho másimu.

Datoluk, Papél Munisípiu sira mak PAM husi munisípiu 14 kompromete atu fasilita prosesu selesaun no preparasaun atleta sira iha nível lokál molok ba tuir kompetisaun iha nível nasionál.

Dahaat, Orsamentu ne’e MJDAK ho CDTL alinña ona planu operasionál ba akomodasaun, transporte no seguransa ba atleta no ofisiál sira.

Jornalista : Hortêncio Sanchez

Editór       : Cancio Ximenes