Inundasaun la afeta ba traballadór timoroan sira iha Korea Súl
DILI, 21 Agostu 2026 (TATOLI)–Adidu Traballu Timor-Leste iha Korea Súl, Feliciano Simões Mendonça, informa inundasaun ne’ebé akontese iha Korea Súl la afeta ba traballadór timoroan sira, nune’e sira kontinua halo atividade hanesan baibain.
“To’o agora ha’u seidauk simu relatóriu kona-ba sidadaun Timor-Leste ruma sai vítima husi inundasaun no rai monu, tanba udan boot ne’ebé monu iha área balun iha parte súl país ne’e,” Adidu traballu relata ba Tatoli liuhusi telefónika, ohin.
Orgaun diplomata ne’e dehan sira kontinua monitoriza situasaun tuir dezastre ne’ebé iha rezulta ema mate, no halo evakuasaun populasaun, aleinde ne’e korte (tesi) eletrisidade iha área afetada balun.
“Maske iha ema ida mate no liu ema atus ida sai husi sira-nia uma tanba inundasaun no korte eletrisidade. Maibé seidauk iha relatóriu katak sidadaun Timor-Leste sira afetadu husi inundasaun ne’e,” nia afirma.
Nia subliña katak, bazeia ba informasaun ne’ebé sira simu to’o agora, seidauk iha relatóriu kona-ba traballadór Timor-Leste ruma ne’ebé hetan kanek, presiza evakua ka afetadu diretamente husi inundasaun no rai monu ne’e.
Enkuantu udan ho intensidade aas ataka área iha parte Korea Súl hahú husi fim semana liubá, liuliu Provínsia Gyeongsang Sul. Sidade kosteira Geoje, ne’ebé lokaliza liu 300 kilómetru iha sudeste Seoul, sai nu’udar área ne’ebé hetan impaktu boot.
Dadus ne’ebé Agência Notísia asesu husi Yonhap hatudu katak Geoje simu udan ho volume besik 805,7 milímetru husi sábadu to’o dadeer segunda-feira, enkuantu Tongyeong rejista besik 671,9 milímetru. Udan boot halo mota sira nakonu no sai husi nia leito, estrada sira nakonu ho bee no mos hamosu rai monu iha fatin balun.
Autoridade Polísia no bombeiru konsege evakua ema na’in-tolu, maibé balun lá konsege salva no seluk hetan kanek.
Aleinde udan boot mós halo mota balun iha Geoje nakonu hodi hamosu inundasaun movimentu tráfiku menus no halo ema balun hela iha situasaun izoladu. Autoridade lokál halo evakuasaun ba populasaun ne’ebé hela iha área ho risku rai monu no mobiliza ekipa salvamentu atu ajuda ema sira-ne’ebé izoladu.
Ajénsia Meteorolojia Korea Súl mós hasai avizu kona-ba udan boot ba área balun iha parte súl. Iha dadeer segunda-feira (17/08) avizu udan boot aplika ba área lima iha Provínsia Gyeongsang Sul, inklui Geoje no Tongyeong.
Ministériu Asuntu Interiór Korea Súl ativa resposta emerjénsia nivel primeiru liuhusi Central Disaster and Safety Countermeasures Headquarters, enkuantu autoridade polísia, bombeiru no ajénsia relevante sira mobiliza atu proteje no evakua populasaun iha área ho risku.
Iha situasaun ne’e, reprezentasaun Timor-Leste iha Korea Súl kontinua monitoriza dezenvolvimentu situasaun, liuliu kondisaun traballadór Timor-Leste sira ne’ebé hela no servisu iha país ne’e.
Jornalista : Alexandra da Costa
Editór : Cancio Ximenes
